Riba lama y tera polis ta cla pa e weekend di Semana Santa

ORANJESTAD - Manera ta conoci caba Cuerpo Policial di Aruba tin su personalnan atento pa cu e weekend druk di semana santa. Campamento a cuminsa dia 25 di maart 2018 desde 12’or di merdia. Desde e dia ey tur personanan cu tin permiso por a cuminsa arma nan tent of pone trailernan pa campa. Sea conciente y percura pa bo mantene bo mes nan e reglanan stipula pa campamento. Polis lo sigui haci control diariamente pa mantene e orden publico y tambe pa percura cu tur persona ta cumpli cu nan permiso.

Tanto riba lama y tera polis lo tin controlnan diaramente. Riba lama lo tin unidad maritimo cu lo percura pa e seguridad y controlnan necesario riba botonan y den caso di emergencia riba awa nos unidadnan lo ta atento pa yega mesora na e sitio pa brinda e prome ayudo. Tanto riba Seadoo y tambe boto lo tin controlnan den nos awanan. Compara cu aña 2017 tabata tin 218 y e aña aki tin 224 permiso.

Riba tera lo tin motor unit, bike team, ATV y patrulla cu lo haci controlnan. Agente policialnan lo haci control riba orden publico y permiso cu cada persona tin pa campa.

Polis ta pidi pa sea conciente cu biento duro e weekend aki banda di lama tanto na Baby Beach, Rodgers Beach, Eagle Beach y Malmok. Tira bista riba muchanan chikito band’i lama percura pa nan bebe hopi awa y tambe cuida nan di solo y percura pa tin supervision di mayor. Percura pa bo tin first aid kit cu bo pa cualkier emergencia.