Oduber: Desaroyador a actua malo den deal pa edificio DTI

ORANJESTAD – Gobierno tin respet grandi pa e desaroyador di e edificio nobo di DTI na Barcadera. Asina minister encarga cu infrastructura Otmar Oduber a bisa den un conferencia diaranson. Den mes rosea sinembargo, Oduber a bisa cu e desaroyador (JAC Holding) mester tabata sa miho y actua corecto, envez di bay sin mas di acuerdo cu minister anterior. Esaki pasobra segun Oduber, e deal cera entre e minister anterior (Benny Sevinger) y e desaroyador, a bay contra ley di comptabilidad y bon gobernacion.

INSTRUCCION

Segun Oduber, no ta cuestion cu e desaroyador a traha un edificio y despues a bay ofrece esaki na gobierno pa huur. E mandatario ta mustra cu ta riba ‘opdracht’ di ex minister Sevinger, e desaroyador a traha e edificio. “Na momento cu e minister instrui bo, y como compania cu tin hopi inversion na Aruba, cu sa exactamente con e aspecto di inversion ta, bo ta suppose di sa cu den e caso ey, e minister mester haci un destaho publico” Oduber a sigui bisa. “Y te hasta, si bo acepte, bo sa cu e minister tin e responsabilidad conforme ley di contabilidad pa tin un ministeriele beschikking cu ta bisa pakico e ta desvia (di e proceso regular)”, e mandatario a sigui bisa.

PURA

E mandatario a sigui cuestiona pakico e tin tanto pura pa pasa contract pa dia 22 di September aña pasa, asambiendas cu tin departamento cu ta bisabo cu e edificio no ta conforme cu reglanan cu a pidi. Ademas a mustra cu no tin placa den presupuesto pa e edificio. E ora por a laga e decision pa e gobierno nobo cu ta sinta, e ta un ‘doorlopende zaak’ pero no tabatin necesidad pa wordo firma pa dia 22 di September. Esaki mirando hendenan a drenta te januari 2018, pues tres luna despues y tin pura, contra tur conseho. E ex minister, segun Oduber, tabata conciente cu el a actua contra leynan existente.