Oduber: Validez contracto edificio nobo DTI por termina den corte

ORANJESTAD – No ta mira otro caminda sino di declara e actual contracto entre gobierno y e desaroyador di edificio nobo di DTI como nulo. Asina minister di infrastructura Otmar Oduber A bisa NoticiaCla den un conferencia di prensa diaranson mainta. Negociacionnan entre abogadonan di gobierno y e desaroyadornan riba e ‘deal’ di e edificio nobo di DTI (Keurlokaal) no ta bayendo bon, segun Oduber. “Nos no ta yegando ningun caminda” Oduber a bisa, indicando cu e combersacionnan ta trancando y no ta descarta cu e lo por bay termina den corte.

RECONOCE CONTRACTO

Esaki pasobra gobierno no kier reconoce e contracto entre e gobierno anterior y e actual desaroyador, y pidi un extencio di un luna riba e contracto interim di 3 luna. “Sinembargo nos no ta mira cu ta soluciona e problemanan cu tin pa cu e edificio aki” Oduber a continua bisando. E no ta mira otro caminda sino dilanti mesa berde, sino di declara e contracto ‘nietig’ cu tur consecuencia cu esaki por tin, di bay corte. E mandatario a bisa cu no por acepta e contracto aki, pasobra no a cana e caminda legal.”Kier men mi tin cu bay laga un huez e ora bisami cu si e proceso cu a wordo hiba di parti di e minister aki tabata esun corecto den e caso di edificio di DTI.

E EDIFICIO

Dienst Technische Inspectie (DTI) a cuminsa cu mudanza pa e edificio nobo 18 di januari na Barcadera 153. Dialuna 5 di februari e edificio tabata 100% operacional atrobe.