Aruba ta reaplica pa haya celnan provisorio pa KIA

ORANJESTAD – Despues cu gobierno anterior no a reacciona, gobierno actual a dicidi cu ta ‘reaplica’ pa bin na remarke pa haya celnan di prison provisorio manera cu otro islanan a haya caba den pasado. Segun minister di husticia di Aruba Andin Bikker, durante su bishita na Hulanda, el a logra papia cu esnan responsabel y a bisa cu ta bin cu e celnan aki. E proceso tin cu bay wordo studia, pa wak con exactamente ta bay haci cu esaki, cuanto nan lo costa pa transporta pa Aruba y cuanto tempo e ta tuma.

KIA YEN

A mustra cu na KIA tin un reto pa loke ta espacio y como tal tin cu wak con exactamente ta bay trata e caso di celnan provisorio. “KIA a yega su capacidad maximo” Bikker a bisa dialuna mainta. E mandatario no por a bisa NoticiaCla cuanto di e celnan aki exactamente lo bin, y pa ki tempo ta kere cu lo por keda cla cu e proyecto aki.