KVK: Gobierno no a consulta cu KVK pa aumento di bbo

ORANJESTAD  – Camara di Comercio (KVK) ta lamenta cu no a consulta cune pa su punto di bista encuanto aumento di BBO. Asina e gremio comercial ta bisa den un comunicado dialuna. Algun dia prome e otro gremio comercial ATIA a bisa NoticiaCla cu nan ta duna gobierno beneficio di duda riba e aumento aki. KvK di nan banda, ta lamenta cu gobierno no a acerca nan pa consulta, mirando e efecto cu aumento di e BBO tin pa henter Aruba y especialmente e comerciante y e sector priva. “Como representante di comercio di Aruba, KvK ta ricibi hopi remarca y comentario. Den su posicion KvK semper ta haci hopi esfuerso pa prepara y formula su puntonan pa duna un conseho na Gobierno. KvK kier remarca cu henter e comunidad tin cu carga e gasto y wordo perhudica a base di e decisionnan aki” Camara di comercio a sigui bisa.

NO A REUNI

KvK a mustra cu nan haci varios intento pa haya un reunion cu Minister di Finansas y Economia, pero no a logra y ta spera cu pronto por haya un cita pa un prome reunion pa asina KvK por duna un opinion y punto di bista concreto riba algun punto di atencion incluyendo e tema di aumento di BBO.