Polis di Oranjestad a gara sospechosonan di atraco

ORANJESTAD - Polis di Oranjestad a gara sospechoso di atraco. Tabata diadomingo madruga pa 01:00 cu central di polis a manda patruya di Playa na Bushiri na altura di Fantastic Garden pa un atraco. Yegando na e sitio ariba menciona e patruya a mira dos mucha muhe coriendo y hisando man . Patruya a para pa nan y nan a conta polis cu nan a caba di wordo atraca un rato prome . Nan tabata sinta riba un piedra banda di Fantastic Garden y diripiente nan a wak un toyota tercel shinishi pasa y bira bek. Un homber a baha di e auto cu un arma di candela y ta pidi nan pa nan tas y placa . El a ranca nan tas y ta subi bek den e auto y bay direccion zuid. Patruya a hiba e dos mucha muhe na warda di Playa na unda atraco team a presenta pa tuma e investigacion y tambe slachtofferhulp mirando cu e dos damitanan a keda hopi spanta. Di biaha patruya nan di Playa a cuminsa cu un buskeda pa e toyota tercel shinishi y na altura rotonde Driemasterstraat ta topa cu e toyota tercel cu tres hende den dje . A logra para e auto y a ordena nan pa baha di e auto. Ta trata di dos hende homber y un hende muher. Den e auto a bin topa cu un arma di candela . Tur tres persona a wordo deteni y hiba warda di polis . E auto a wordo tuma den beslag pa mas investigacion.