Pelea na final di Arubadag a pone e evento para mas tempran

RIJSWIJK – E evento annual na Hulanda ‘Arubadag’ a caba mas tempran cu normal debi na un pelea entre algun persona na e sitio. Mesora seguridad a para e evento, y polis a bin pa detene esnan cu a bringa y restablece orden publico. “Esaki no ta e manera cu e Comision Arubadag kier a mira con Arubadag 2018 a termina. Un dia sumamente exitoso unda un cantidad record di publico a bin De Broodfabriek pa celebra en grande nan dia nacional” E comision organizador di Arubadag a bisa den un comunicado diadomingo atardi.

E SUSESO

Segun informacion ricibi, rond di un cuarto pasa di 7 ora di Hulanda, tabatin dos persona cu a cuminsa un bringamento den e lugar (Broodfabriek) na Volmerlaan na Rijswijk, cu por cierto tabata ‘sold out’. Esey a pone cu e ekipo di seguridad mesora a dicidi di para e evento. Prensa Hulandes ta raporta cu un grupo grandi di polis Hulandes a yega pa establece orden publico, y a pasa pa detene esnan envolvi den e bringamento. “Esnan cu a cuminsa e pelea a wordo domina y separa di otro, y hopi rapido e pelea a keda controla” e comunicado ta sigui bisa. “Un dia sumamente exitoso unda un cantidad record di publico a bin De Broodfabriek pa celebra en grande nan dia nacional” e comunicado a finalisa bisando.

TREMPAN

E evento ta uno annual unda cu Arubianonan studiando y of simplemente bibando na Hulanda (y ciudadanonan di otro partinan di Reino Hulandes) ta presenta riba un dia sea prome of despues di e fecha di 18 di maart, unda cu ta brinda nan esnan presente, musica di Aruba (cu hopi biaha bandanan cu ta bin special for di Aruba), cuminda y otro artefactonan di nos isla, pa duna e evento un toke ‘local’ pa esnan cu ta leu di cas. E aña aki gruponan musical cu a bin tabata e.o. Tsunami, Buleria, y Grupo di Betico, y un delegacion di prensa di Aruba cu a transmiti esaki mayoria biaha via livestreaming di Facebook. Den pasado caba e evento a haya un nubia scur ora cu tabatin tiramento pafo (tambe na final di e evento). Fotos cortesia www.Regio15.nl