Medidanan ‘nobo’ conoci pa controla manifestacion di diaranson

ORANJESTAD – Medidanan nobo pa e manifestacion diaranson ta inclui prohibicion di vuurwerk, arma, cacho y mas. Esaki ta un lista extra di medida cu polis lo anuncia diamars mainta na comunidad, pa tene cuenta cune pa e manifestacion di diaranson atardi. NoticiaCla.com a confirma pa medio di su fuentenan yega na polis, cu un lista di por lo menos 10 punto extra a keda añadi na e permiso di e manifestacion, pa sigura cu e manifestacion no por bay ‘for di man’ y pa cosnan cu a sosode biaha pasa ,no sosode mas.

Durante un conferencia di prensa diamars mainta, mando policial lo divulga kico tur e ‘extra’ medidanan lo ta. Entre nan, manera NoticiaCla.com a raporta caba, tin e prohibicion di cualkier tipo di vuurwerk of ‘explosivo’. Tambe lo regula e nivel di zonido di cualkier aparato , pa medio di e nivel di e decibel. Cualkier tipo di arma, of obheto cu por wordo uza como arma, tambe lo wordo kita di e persona(nan) si nan tin nan den posicion diaranson durante e manifestacion. Uso di cacho, (a compronde cu lo kier bin cu cacho pa confronta e cachonan di polis) tambe lo no wordo permiti. Intento di ‘opruiing’ tambe lo no wordo tolera diaranson atardi. Esaki ta pues e intento pa ‘instiga esnan presente pa haci daño y pa trece panico den e publico’.

Pa e manifestacion, korpschef Dolfi Richardson mes lo ta ‘in charge’ diaranson, pa asina pone ordo manera cu mester ta, y garantisa cu esaki lo bay den un forma pacifico y ordena. Kier evita a todo costo, cu por sosode loke a sosode den e ultimo manifestacion, cu mester a resorta na uso di riot comando y e cachonan di polis. No ta conoci si nan lo ta ‘on standbye’ si. Tur esei lo tende diamars mainta ora cu polis divulga e informacion aki.