CAFT kier mas medida cu ya caba ta presenta den e FEM

ORANJESTAD – E colegio di supervision financiero pa Aruba (CAFt) kier gobierno tuma mas medida cu ya caba ta presenta den e Financieel Economisch Memorandum (FEM). Asina nan ta bisa den un conseho di 8 pagina, publica awe riba nan website, pero cu gobierno di Aruba tin caba 3 siman den su poder. Segun e colegio, nan no ta kere cu e contenido di e FEM ta suficiente pa yega e norma di deficit di 0.5%. Y pa logra esaki mas liher, nan ta sugeri un total di 6 medida extra pa gobierno cumpli cu ne. Cu e presupuesto pa 2018, incluyendo e medidanan segun e FEM, gobierno no ta cumpliendo cu e norma pa 2018 segun CAFt, pasobra esaki ta 3.9% deficit en bes di 0.5% stipula. Y como tal nan ta sugeri e medidanan extra. MEDIDA “Nos a constata cu bo kier crea un reduccion di e quota di debe den un 50-70% di e PIB. Pero nos kier pa e reduccion aki ta aun mas grandi. Nos kier pa e norma di 0.5% wordo logra mas prome cu 2021” Caft ta cuminsa na bisa. Ademas Caft kier prudencia como punto di salida, ora ta trata estimacion economico. Ademas Caft ta ordena pa den liña cu FEM, uza e entradanan incidental den 2018 y e otro añanan pa reduci e deficit y pa establece esaki den un ley. Tambe Caft ta haya necesario cu gobierno mester por mustra/presenta un reduccion multianual di personal y ta ordena gobierno pa tin un reduccion serio den otro gasto. PPPPa loke ta e fondonan necesario pa e proyectonan PPP, esaki ta manca e presupuesto multianual. Como tal CAFt ta conseha pa por lo pronto, evita e proyectonan nobo di PPP. Tambe CAFT kier pa gobierno splica mas den edetaye, con e medidanan presenta lo ta, pa e proximo añanan. Entre esey nan kier tende mas riba e reforma fiscal, inclusive e pakete di compensacion, e independisacion di AZV, e proyecto di automatizacion y e medidanan di cumplimento, cu ainda no por duna un comentario riba e realizacion real di esaki. Pues no por deduci si tur esaki presenta, en berdad lo por logra su meta. Tambe ta importante pa inclui e efectonan di e saldonan di e otro entidadnan di e sector colectivo. Finalmente, ta recomenda pa splica mas riba un model nobo di crecemento economico. Lesa e carta completo AKI.