Wever na NoticiaCla: Hopi a recomenda otro cos, envez di crisis heffing

ORANJESTAD – Hopi ta esnan cu a conseha prome minister Evelyn Wever-Croes pa yega na e meta di reduci e deficit di otro forma, envez di aumenta e impuestonan manera cu a keda anuncia di otro forma. Aki Wever ta referi na p.e cu por a saca mas dividend di companianan di gobierno, bende accionnan di e companianan etc. Pero pa Wever, aunke ta un posibilidad, nan no ta decisionnan structural, sino incidental. “Na e alturanan aki mester a bin cu decisionnan structural pa realmente soluciona e problema financiero” Wever a bisa.

BESTIA CU OTRO NOMBER

Un di e criticanan cu tin ta cu a djis ‘yama e bestia pa otro nomber’, esta di camufla e aumento di BBO/BAZV bou di e nomber di ‘crisisheffing’, pa djis no tin cu bisa cu gobierno a aumenta BBO. “Ya, riba su mes manera mi a bisa, e (crisis heffint) ta bay wordo cobra na mesun manera. Dus si bo kier wak e asina (esta cu a cambia nomber solamente), ta wak e asina” Wever a bisa. Pero segun e prome mandatario, tabata importante pa a ‘benoem’ e separa, pasobra e ta temporal. “E BBO no ta temporal, e BAZV cu a wordo introduci, no ta temporal. Pesey nos mester denomina diferente pasobra e ta temporal y nos ta bay haci algo pa elimina tambe” Wever a sigura NoticiaCla.

SOSTEN

“Hopi sosten. Awe mi a sinti hopi sosten” Wever Croes a sigura e portal aki riba e decision anuncia mas prome diahuebs. Segun e prome mandatario, hopi hende den comunidad a compronde e decision anuncia pa gobierno pa sanea e situacion financiero. “Naturalmente bo tin oponentenan cu tin cu haci nan rol” Wever a sigui bisa. E ta admiti cu su partido MEP ta sostene e decision pero no ta contento. “Cu nan ta contento, no. Cu ami ta happy awe, absolutamente cu no” Wever a sigui bisa. E ta hasta yama esaki e dia mas dificil den su carera di henter su bida.