Ni cu medidanan anuncia, gobierno no ta logra cumpli cu LAft

ORANJESTAD – E medidanan anuncia pa gobierno awe, lo no logra gobierno cumpli cu e ley di Laft, esta trece e deficit na e norma stipula. “E contesta ta no. No tin ningun manera humanamente posibel, pa e aña aki, nos cumpli cu e gap di 300 miyon cu nos a bin encontra” premier Evelyn Wever Croes a bisa NoticiaCla diahuebs. Loke si e medidanan ta haci segun e prome mandatario, ta cera e gap mas tanto posibel. Ora cu CAFt a wak e programa aki pa prome biaha, nan no tabata contento y a pidi pa cera e buraco un poco mas.

CERA BURACO MAS

“Awor nan a pidi pa por fabor no bay cita un suma mas halto cu aña pasa” Wever a bisa, refiriendo na e deficit di 155 miyon florin. Gobierno a compromete nan mes na tene na menos cu 155 miyon florin. “Cu esey nos ta considera cu ora cu CFT haya e presupuesto, cu e deficit di menos cu 155 miyon florin no ta problema” Wever a bisa. Mientras cu e no ta e solucion ainda, CAFt sinembargo (segun Wever Croes) a indica cu e ta e prome paso den e bon caminda (pa soluciona e problema financiero).