Evelyn Wever: Hulanda dispuesto pa ‘suavisa’ medida contra Aruba

DEN HAAG – Hulanda ta dispuesto pa suavisa e ‘medidanan contra Aruba’, contal cu yega cu compromisonan concreto cu gobierno di Aruba. Esaki ta e mensahe principal cu lider di partido MEP, Evelyn Wever a haya di minister hulandes Ronald Plasterk diamars mainta y a confirma esey diamars mainta na NoticiaCla.com for di Hulanda. “Nan kier yega na un compromiso cu gobierno di Aruba prome, pa mustra cu di berdad nan ta dispuesto pa pone orden den e desorden financiero”. Si esaki tuma lugar, y mira un cambio, por suavisa e efectonan cu e medidanan mester tin, Wever a sigui bisa NoticiaCla.com. Segun Wever, Plasterk no ta ‘rabia’ cu Aruba, pero si tin un problema ‘serio’ di confiansa entre gobierno di Aruba y esun di Hulanda.

Pa loke ta e reunion cu Wever a tene cu secretario general Richard van Zwol, Wever a toca e parti tecnico. Segun van Zwol na Wever, tur e medidanan impone pa secretariado di CFT, mester ta hinca den e presupuesto ‘nobo’ di 2014, incluyendo e ‘meerjarenraming’ pa e proximo 4 pa 5 añanan. Foto cortesia  di Evelyn Wever Croes, drpd, Richard van Zwol (secretario general KR) , Erwin Arkenbout (director Koninkrijks Relaties),  Evelyn Wever Croes (lider partido MEP) y Ronald Plasterk (minister Koninkrijk Relaties)