Abogado Gomez ta desmenti aceptacion di culpabilidad di Marisol Lopez

ORANJESTAD – “ No tin ningun aceptacion di culpabilidad di parti di ningun persona, sigur no di mi clientenan. Cu esaki e caso a yega su fin y na e momentonan aki no tin ningun acusado mas. E sugerencia cu a wordo haci den media durante dia cu un di mi clientenan lo a haci declaracionnan falso of cu e a ricibi un castigo penal no ta klop” abogado Dello Gomez a bisa, representando su cliente, parlamentario Marisol Lopez Tromp. E ta reacciona asina despues di a tuma nota di e declaracionnan di ex parlamentario Chris Dammers, cu riba e portal 24ora a sigura cu Lopez Tromp mester paga un suma di placa como multa. Algo cu anteriormente Lopez Tromp a desmenti.

DEMANDA

Gomez den representacion di Lopez y su casa, a splica cu den e caso aki tabatin 3 demanda haci y tres acusado. Ministerio Publico a dicidi di para tur 3 caso y no manda ningun di 3 corte. “ Esaki ta a base di e prerogativo y discrecion di Ministerio Publico manera ancra de nos ley penal Ministerio Publico no a y no ta huzga e culpabilidad di ningun hende, solamente ta investiga casonan cu ta yega nan dilanti y ta dicidi si e caso aki ta bay corte of no” Gomez a bisa. Segun e abogado, si e lo bay corte e ora juez lo por a dicidi. E caso aki no a yega asina leu pa bay dilanti di corte.

HECHONAN

Segun Gomez, e ta basa su mes riba e hechonan disponible den e investigacion y e aspectonan juridico y no pa sirbi otro interes. “Mi ta uni mi mes na Ministerio Publico y tambe ta constata cu e ultimo aki no por wordo bisa di esnan cu ta bin ta comentando den medionan di comunicacion tocante e caso” Gomez a finalisa bisando.