OM: No ta persigui parlamentarionan envolvi den incidente

ORANJESTAD – Ministerio publico a dicidi cu no ta persigui ex parlamentario Chris Dammers y actual parlamentario Marisol Lopez Tromp un den incidente na mei di 2016. Dammers mientrastanto ta sigura den un declaracion na e portal 24ora cu Lopez a haya un multa di 400 florin, pero Lopez a desmenti esaki na NoticiaCla.com. OM no kier duna mas informacion riba e detayesnan, y e portal aki ta wardando riba declaracion di abogado di ambos.

INCIDENTE

Den un comunicado emiti diahuebs atardi, ministerio publico a splica e situacion den e caso aki aunke no a duna detayes personal. Landsrecherche a haci investigacion di un supuesto incidente durante reunion den Parlamento di Aruba riba 25 di mei 2016. E investigacion a dirigi su mes contra tres persona. Landsrecherche a bin cla cu e investigacion den e di dos mitar di 2017. Ministerio Publico ta confirma cu recientemente Fiscal di Husticia a tuma decisionnan pa finaliza e caso.

SEPOT

Den un di e casonan, Ministerio Publico a dicidi pa un asina yama onvoorwaardelijk sepot (esta, cu e persona lo no wordo persigui). Den e dos otro casonan, Ministerio Publico a dicidi cu nan lo no wordo persigui, pero bao condicionnan. E personanan aki a wordo poni na haltura di e decision di Ministerio Publico durante un asina yama officierszitting y a bay de acuerdo.

DETAYES

Ministerio Publico no ta desea pa bay divulga en detaye tocante casonan individual y ta enfatiza cu e decisionnan ta de acuerdo cu e maneho di Ministerio Publico y ta den liñea di e circumstancianan particular di e caso specifico aki.

Pa yega na su decision Ministerio Publico a basa su mes riba e hechonan disponible den e investigacion y mas cu claro no a sirbi ningun interes politico.

Ministerio Publico ta constata cu e ultimo aki no por wordo bisa di esnan cu ta comenta den media tocante e caso.