Segun mentor di Zuckerberg, scandal di data por destrui Facebook

LOS ANGELES – E scandal di data cu a afecta e red social mundial Facebook, por destrui Facebook. Asina ex mentor di e creador y CEO di Facebook, Mark Zuckerberg, esta Roger McNamee a bisa. Segun McNamee, si Facebook no atende cu e scandal recien, epor caba cu e red cu tin mas di 1.6 biyon seguidor. Awe nochi mientrastanto Zuckerberg ta duna un entrevista riba CNN, kibrando e silencia riba e tema aki.

KICO A PASA

E entrevista ta bin despues di un crisis di noticia cu e compania di data Cambridge Analytica, -un compania liga na campaña presidencial di presidente Mericano Donald Trump-, a haya informacion di 50 miyon usuario di Facebook, sin nan permiso. Segun e raportahe riba CNN, Facebook a bisa cu inicialmente e data tabata pa un profesor pa uso academico, den cuadro di nan reglanan. E informacion despues a keda transferi pa un tercer partido, incluyendo Cambridge Analytica, cu ta viola e politica di Facebook.

SILENCIO

No obstante su posicion publico, manehando un di e companianan mas grandi na mundo, Zuckerberg segun CNN ta prefera papia pa medio di su postnan di Facebook mes, envez di duna entrevista. Pero diaranson anochi e ta kibra su silencio. Facebook a perde basta credibilidad e ultimo simannan aki y tambe den bolsa di balor a sinti e sla. Politiconan Mericano a pidi te hasta pa Zuckerberg testigua dilanti congreso pa duna cuenta di e problema cu a surgi. Potret cortesia www.sheleadsafrica.org