Hopi entusiasmo pa participa den proceso pa atende cu sushi di Aruba

ORANJESTAD – E interes pa participa den e proceso di regla e asunto di sushi (desperdicio) na Aruba tabata grandi. E siman aki e parti di e proceso pa yega na e procesamento definitivo di sushi a continua. E prome fase tabata e RFI (Request For Information), pa cual gobierno a mustra di ta hopi contento pa mira e entusiasmo cu tabatin. Segun un informacion di parti di minister responsabel pa medio ambiente Otmar Oduber, e tabata un proceso cu a tuma luga transparente cu Notaris Ted Johnson (tur informacion cu a wordo suministra a sosode via un e-mail pa e Notario).

COMPANIANAN

Un total di 20 compania a inscribi pa e parti di maneho di desperdicio aki na Aruba y 14 compania a inscribi pa e parti di remediacion di dump Parkietenbos. (Tin companianan cu a manda informacion pa tur dos).

E parti tecnico di e steering committee lo bay evalua tur informacion cu a drenta di e companianan y esaki mester ta cla pa 13 di april. Unabez cu e trabou aki termina, a base di informacionnan compila tambe di e varios reunionnan cu a tuma luga den e ultimo simannan cu e stakeholders, NGO's, companianan priva na Aruba etc (ta calcula cu e proceso aki lo ta cla pa final di april) e ora lo saca un Request For Quotation (RFQ) cual ta e 'actual bidding' pa determina cua ta e compania cu ta bay duna un mihor bid.

CRITERIA

Ta bay midi tur informacion cu a drenta di e companianan (local, Europa, China) y filtra e informacion a base di:

- Nan tecnologia presenta,

- Locual comunidad tin mester di dje,

- E parti financiero/economico,

-y con e contract ta hinca den otro.

Esaki ta importante pasobra como Gobierno a tuma e decision cu kier pa Serlimar keda e compania cu ta recoge sushi y ta yuda maneha e desperdicio akinan na Aruba. Esaki ta un compromiso cu a haci cu empleadonan di Serlimar y pues a informa e companianan debidamente di e posicion cu Serlimar mester por keda mantene.