Varios minister di Gabinete Wever Croes pareu na Hulanda

DEN HAAG – Por lo menos tres minister di gabinete Wever Croes ta na Hulanda pareu actualmente. E ta bira 4 si inclui minister plenipotenciario. E ministernan cu ta na Hulanda ta Glenbert Croes, Andin Bikker y Xiomara Ruiz Maduro. E dos ultimonan a bishita colega minister Guilfred Besaril. Den pasado den gabinetenan diferente, tambe esaki a sosode unda cu den un solo biaha, varios minister a biaha pa Hulanda pa trabou. No ta conoci si nan a coincidi esaki of si ta puro coincidencia cu tur a bay hunto, of si a planea esaki pa ta presente mes momento na Aruba Dag diadomingo awor na Hulanda. Ministernan cu a keda Aruba ta Wever Croes, Otmar Oduber, Cris Romero.

TRABOU

Segun un comunicado di Arubahuis, Bikker y Ruiz Maduro ta na Hulanda pa un bishita di trabou, pero no a haci mencion di Glenbert Croes. Su bishita tambe ta di trabou, y a relata di su bishita via di su pagina di Facebook. Pa loke ta Ruiz Maduro, e l lo reuni cu Secretario di Estado pa Asuntonan di Reino Raymond Knops y tambe cu presidente de CAft Prof. Gradus. Tambe e minister lo tin un reunion cu Minister di Enseñansa, Cultura y Sciencia Ingrid van Engelshoven. Durante di su bishita di trabao minister Ruiz-Maduro lo tene reunion cu diferente ehecutivonan di CBS di Hulanda, De Nederlandse Bank, Nationale Restauratiefonds y Investment Project NFIA. Bikker lo topa y reuni cu su colega Hulandes Ferdinand Grapperhaus y Secretario di Estado di Husticia Mark Habbers. Tambe minister Bikker lo reuni cu Secretario di Estado pa Asuntonan di Reino Raymond Knops, vice presidente di Raad van State Piet Hein Donner y Ernst Hirsch Ballin. Tambe e mandatario ta haya un recorido na Koninklijke Marechausse na Aeropuerto Schiphol y tambe e prison na Zaanstad. Potret ta cortesia di Cas di Aruba. Minister Glenbert Croes a reuni cu Arubahuis pa e asistencia social na nos comunidad na Hulanda y pa nos inicia e trabaonan pa realisa e projecto: Job matching programm/job bank pa nos studiante nan y nos Comunidad Arubiano biba na Hulanda.