Knops: No conta cu Hulanda pa financia refugio di Venezolanonan

DEN HAAG – Aruba y Corsou por lo pronto no mester conta cu placa di Hulanda pa loke ta refugio di migrantenan Venezolano. “Nos no ta responsabel pa esey” Raymond Knops, secretario di estado Hulandes pa Asuntonan di Reino a bisa. “E ta un asunto netamente local”.

Premier Evelyn Wever-Croes a adverti anteriormente riba e miles di Venezolano cu lo por bin Aruba si e situacion na Venezuela sali for di man. Tanto premier di Aruba como esun di Corsou kier pa Hulanda duna cen pa por atende cu e situacion di refugio riba e islanan.

Hulanda sinembargo ta solamente dispuesto pa yuda cu ayudo ‘tecnico’ riba e tereno di imigracion y asilo. “Nos no ta laga e islanan desampara, pero esey no kier men cu Hulanda lo habri potmoni pa tur cos” Knops a bisa. “E placa ey nos no tin presupuesta”.

Instancianan di gobierno ta bisa cu mas y mas y Venezolanonan ta huy pa e islanan debi na e situacion economico y politico. Miembro di Tweede Kamer, Andre Bosman (VVD) kier aclariacion di e situacion y a haci un serie di pregunta riba e situacion na e secretario di estado. REFUGIADO

E gabinete Hulandes no ta considera e Venezolanonan cu ta bin e islanan ABC como refugiado. Asina e minister ‘nobo’ di relacionan exterior Hulandes Stef Blok a bisa Tweede Kamer.

Segun e mandatario, e Venezolanonan no ta cumpli cu e tratado di Nacionan Uni riba refugiado. Segun e tratado, mester por papia di un tipo di ‘menasa personal’, e minister a bisa. Por ehempel, cu nan tin miedo pa wordo persigui pa motibo di nan escogencia politico. Potret cortesia Daily Herald. Fuente Caribisch Netwerk.