Linea crusero tabata kier Aruba pa su so como destinacion

ORANJESTAD – E liña crusero Royal Caribbean tabata kier Aruba su so, como destinacion estilo cu nan tin cu nan isla priva ‘Labadee’ na parti norte di Haiti. Asina director di Aruba Ports Authority NV Jossy Figaroa a splica dialuna mainta. Esey lo a nifica cu otro liña crusero no por a bin aki mas. Esey a bira un problema ora cu e liña crusero Carnival a tende, nan a bisa cu si ta esey ta bira e direccion di Aruba, nan interes pa otro isla ta bira miho. Como tal no a acepta esey (e propuesta) segun Figaroa, y como tal no a considera esaki. Loke si por ofrece nan, ta un percela riba e tereno cu ta bira Port City, unda cu nan (y otronan) por desaroya otro cos. Den pasado caba por corda cu e liña crusero aki kier a inverti den e waf, y hacie di dje so. Algo cu e tempo ey caba, gobierno di Aruba a nenga rotundamente.

GANA PLACA

Bapornan crusero ta gana placa di tres manera, cu ta placa cu e turista ta paga na e pasashi, na loke e turista ta gasta abordo, y cu e tours nan cu tin cu e turistanan ta cumpra abordo. E locual e turistanan ta gasta abordo, Aruba como destinacion no tin control ariba. Pa Aruba importante ta cu e destinacion ta keda mustra un destinacion ‘marquis’ cu e turista y crusero ta dispuesto pa paga mas hopi pe, y na mes momento nan lo por paga mas na e fuel. Semper nan ta purba baha nan gasto.

FEE

Tin un suma di placa (fee) cu Aruba ta cobra e bapornan crusero pa yega y mara, pero no por haci mucho cu esey mas, pasobra a subie algun tempo atras caba. Si e ‘fee’ ey bira mucho grandi, e bapornan crusero por cera cabez y bisa cu nan no ta bin Aruba mas. Pesey tin un asociacion (FCCA), unda cu e bapornan crusero y Aruba tambe (APA) ta forma parti di dje segun Figaroa. Eynan tin un directiva unda cu bo por trata cu nan pa cualkier cambio. Aruba a cana un tempo 8 aña pasa pa por convence FCCA y e lineanan crusero pa aumenta e fee na 2015. Pero aworaki no por aumenta esaki mas por lo pronto. Segun Figaroa, ta porta na 2020 por tin un otro oportunidad pa aumenta e fee aki, mirando tur e trabaonan extra cu a haci desde p.e 2015, cu ta beneficia e bapornan crusero. Figaroa a duna como ehempel, Brazil, unda cu a traha un waf nobo pa crusero so, y a aumenta e fee di tal manera cu ningun bapor crusero no a bin eynan mas. Pues mester tin cautela ora cu ta haci e cambionan ey. E fee di St Maarten mientrastanto, mas mas halto cu esun di Aruba, pa motibo cu pa nan, e ta mas cerca y miho pa hacie. Y e acogida (prome cu e horcanan di aña pasa), tabata hopi mas grandi cu Aruba, den sentido cu hopi mas bapor crusero ta bay St Maarten, envez di Aruba. Nan tabata ricibi 1.7 miyon turista crusero pa aña.