APA ta cuminsa cu trabou di coba canal pa ricibi barco mas grandi

ORANJESTAD – APA ta bay haci trabou di entre otro cobamento den e canal di waf. Esaki pa por ricibi bapornan cu ta bin Aruba cu no a bin nunca ainda y ta mas largo y hundo. Segun director di Aruba Ports Authority NV Jossy Figaroa durante un conferencia di prensa dialuna mainta, e nautical manager di APA a bisa cu e bapornan por drenta, pero cu ta e companianan Royal Caribbean a pidi pa haci e trabou di mantencion den e canal, unda cu tin un minimo di 12 meter di profundidad. E canal aki a wordo prepara mas di 60 aña pasa, despues 40 aña pasa a haci mas trabou ora cu a bin cu e container haven. 

DESTAHO E barco cu ta bin haci e trabou di cobamento ta na caminda pa Aruba caba, y ta un compania Hulandes (Bage Bedrijf De Boer), cu a gana e destaho publico y ta cobra 4 miyon florin pa e trabou cu lo dura entre 4 pa 7 siman di tempo (e cobamento ta 4 siman), y ta encera tambe busca un subcontratista local pa e trabou cu ta encera e waf di Barcadera tambe. Den preparacion pa e proyecto aki, cu e material cu lo saca, lo a bay pone banda di Bushiri unda cu e ta safe unda cu Aruba mes ta use. E material cu nos lo saca, ta mucho mas grandi cu a kere, y cu tin lodo cu no por uza esaki. A haya un reto e ora pa wak con ta haci cu e material cu lo saca di e canal.