CFT contra un ‘transaction tax’ pa financia proyectonan PPP

ORANJESTAD – E secretariado di College Financieel Toezicht ta desconseha gobierno pa implementa un ‘transaction tax’. Segun e rapport, -cu NoticiaCla.com a tira un bista ariba-, CFT ta mustra cu e intencion di gobierno di Aruba ta pa introduci e tax aki pa por cubri e proyectonan PPP (Private & Public Partnership). Pero e peliger, -segun CFT-, ta cu lo crea un peliger riba ponemento di prioridad integral di gobierno pa cumpli cu pagonan. “Ademas no ta mucho cla, kico e consecuencianan ta di un cobransa riba e transaccionnan financiero di banco”. Como tal CFT ta conseha gobierno pa investiga bon, kico e consecuencianan negativo ta, ‘prome cu tuma tal paso’.

Ta netamente e adaptacion di e presupuesto, pa por acapara e buraconan aki, ta pone cu , -segun CFT-, e quota di debe ta aumenta te na 80,7% den 2014. Despues di un caido inicial di e deficit (danki na medidanan aumenta) pa 2018, esaki lo aumenta atrobe debi cu mester bolbe paga indexering, tin aumento di gastonan di personal, interes, pago di cuido medico, y construccion di e proyectonan PPP.

Segun CFT, e entradanan lo no por alcansa e gastonan, cu ta pone cu e deficit como porcentahe di e BBP, lo aumenta atrobe. Sin medida adicional, e deficit lo aumenta riba 4% na 2020 y despues sigui aumenta. Esey ta, -si e tur e medidanan cu tin cu wordo tuma aworaki-, enberdad wordo tuma tambe. Mes momento e ta indica tambe cu ni maske tuma tur e medidanan pa 2014, e ta algo temporal, y no ta suficiente pa ‘bira e trend bek’. “Berdad cu e crecemento di e debe ta wordo ‘frena’ pero despues di algun aña, esaki ta aumenta atrobe. “Y pesey ta importante pa adapta e presupuesto den un forma structural, door di frena e crecemento di gasto door di reduci e cantidad di personal di gobierno grandemente, y pa atende cu e parti di ‘salario di ambtenaar’. “Door di cu e gasto di interes y e salarionan ta aumenta fuertemente door di pago di indexering, y mas cu mester, e ta crea un situacion incontenible”.

Mester nota si, cu minister di finanzas Angel Bermudez a informa NoticiaCla.com algun tempo pasa, cu e idea ta ainda un idea, y cu tin cu analisa esaki profundo prome cu por introducie. Y si dicidi mes pa introduci esaki, e mas prome cu esaki por tuma lugar ta 1 di juli 2015. Di otro banda, prome minister Mike Eman na varios ocasion a bisa caba cu e financial transaction tax ta practicamente un hecho.