Knops: Presupuesto 2018 sin exigencia di CAFT aden, ta nifica aanwijzing

DEN HAAG/ORANJESTAD – Si gobierno di Aruba no entrega e presupuesto di pais Aruba pa 2018, conforme e exigencianan di e colegio di supervision financiero, lo recomenda pa Aruba haya un instruccion, osea un aanwijzing. Asina un documento di secretario di estado Hulandes Raymond Knops ,-cu a ‘leak y cu NoticiaCla a pone su man ariba’-, cu mester a wordo entrega awe durante e conseho di minister di Reino Hulandes ta bisa. E carta y informacion (cu ta contene tambe e conseho di CAFT) a aparece den e corant Antiliaans Dagblad awe mainta tambe. E documento ta trece claridad riba e noticia cu NoticiaCla a presenta diaranson mainta, cu a causa tanto conmocion. Den e articulo, e portal a indica cu riba propio declaracion di prome minister di Aruba Evelyn Wever Croes, un aanwijzing pa Aruba ta eminente. Cu e documento aki cu a leak, e declaracion ey ta haya mas peso.

E CARTA

E carta procedente di secretario di estado Knops, cu a leak ayera caba, ta bisa e.o. cu e plachi financiero di Aruba ta keda hopi preocupante. Ta mustra cu Aruba no a logra alcanza e norma di 0.5 % di e deficit na 2017. Como tal 2017 lo sera cu un deficit di 3.1% di e Producto Interno Bruto (PIB). Ta sigui bisa cu e deficit ta causa entre otro pa entrada decepcionante di impuesto y e hecho cu ainda e refineria no a habri. Pa 2018, segun e documento, e presupuesto nobo ta ilustra un deficit di 3.9%, cu ta pone cu atrobe e norma di e ley di CAFT esta e LAFT no ta wordo alcasa. Esaki mientras cu tin un norma di 0,5% apunta. Den e presupuesto no a tene cuenta cu e comensacion di deficit di 2017, conforme e ley di LAft. “ E deficit di 2017 no por wordo adopta den 2018, of plama den e añanan siguiente. Esaki ta pone cu e deficvit presenta di 3.9% PIB ta conduci na un aumento adicional di e quota di debe pa 91% di PIB.

CONSEHO CAFT

Knops ta sigui bisa cu CAFTA a avisa Aruba cu e deficit di 2018 mester ta menos cu e deficit di 2017 (3,1% PIB den 2017). Banda di esaki e colegio ta suplica di Aruba (su gobierno) pa tira un bista critico un biaha mas riba e aumento di gasto y e FEM.

AANWIJZING

Na final, skibi na man e biaha aki, Knops ta skibi cu Aruba tin te dia 30 di april proximo pa entrega un presupuesto conforme e exigencianan di CAFT, sino ta sigui un aanwijzing pa pais Aruba. Pues no ta cuestion cu ta cumpli cu e deadline di 30 di april sin mas, pero cu e exigencianan di CAFT mester aparece den e presupuesto tambe.

BIAHE

E siman entrante minister di finanza Xiomara Ruiz Maduro ta biaha pa Hulanda pa atende e situacion financiero cu gobierno Hulandes pa wak con ta logra sali afo y toch purba evita un aanwijzing of un asina yama instruccion. No obstante esey, prome minister di Aruba a bisa diahuebs den un conferencia di prensa cu tin no un, sino tres (3) motibo valido pakico Aruba por haya un aanwijzing. Por lesa e documento AKI.