Hulanda kier sa si Aruba por cumpli cu notificacion di Nacionnan Uni

ORANJESTAD – “Hulanda a pidi nos pa nos informa nan ta con nos por cumpli cu e notificacion”. Asina prome minister Evelyn Wever a reacciona pa NoticiaCla riba e notificacion di Nacionan Uni pa paisnan bisiña acepta tur Venezolano y no debolbe nan pa nan pais. “Nos a delibera cu (departamento di) binnenlanse zaken y den Reino (riba e asunto), Wever a sigui bisa. No ta asina cu Aruba ta obliga pa atene na e ‘notificacion’ segun Wever, sino mas bien un ‘peticion’. “Nos ta tuma na consideracion y evalua si y con nos lo por cumpli cu e peticion” Wever a sigui bisa.

AYUDO

Wever a mustra cu Aruba no por atende cu e caso aki su so, si e dicidi pa duna aden na e notificacion/peticion. “ Nos mester asistencia logistico y financiero di Hulanda y UN y nos ta den e preparacionnan ey. Despues nos lo dicidi si y con lo cumpli cu e notificacion” Wever a finalisa su comentario riba e tema aki. Durante un conferencia di prensa awe mainta, e mandatario lo elabora mas riba e tema.

E NOTIFICACION

Algun dia prome Wever a bisa e portal aki cu Aruba ta wardando riba e instruccion final di departamento relacionnan exterior di Reino, riba e asunto di refugiado for di Venezuela. Tabata trata di e woordvoerings lijn, y ta prepara pa cualkier eventualidad. Asina prome minister di Aruba Evelyn Wever Croes a bisa, reaccionando riba e recomendacion di Nacionan Uni pa reconoce Venezolanonan como refugiado. “Si algo pasa, nos ta prepara pe” premier Evelyn Wever Croes a bisa riba e asunto aki. “E (caso di Nacionan Uni) no ta un instruccion si, sino un recomendacion” Wever a bisa, den sentido cu no ta obliga pa haci loke cu Nacionan Uni a recomenda.

SITUACION

A referi na e anuncio di e instancia di Nacionan Uni pa refugiado esta ACNUR mas tempran e siman aki, pa tur pais cu atende cu Venezolano, reconoce nan como refugiado y atende nan diferente, a gara varios pais como sorpresa, incluyendo Aruba. NoticiaCla awe mainta a compronde cu gobierno mester a ‘scramble’ pa un contesta y pa wak con e ta bay atende cu esaki. E portal aki a compronde cu nan a keda inunda cu peticion pa reaccion riba e asunto aki, pero no tabata cla ‘ainda’ pa informa publicamente riba esaki. 

PETICION

Tabata e siman aki cu e instancia menciona di NU, esta ACNUR, den un documento di 3 pagina, ta ‘pidi’ of ‘recomenda’, pero no instrui paisnan receptor di Venezolano, pa trata nan di tal forma cu nan no mester wordo manda bek nan pais, reconoce nan como refugiado, y cu ACNUR ta dispuesto pa asisti cu esaki. Tin reglanan internacional cu e paisnan receptor tin cu tene cuenta cune, y conforme esaki, ACNUR ta dispuesto pa asisti den esaki. Tin tratadonan cu mester atene na dje, y tin paisnan cu a firma un acuerdo y otronan no. Pues ta depende unda Aruba ta situa den esaki, cu e lo por actua.

LUGAR

Tabata algun tempo pasa cu prome minister Evelyn Wever a haci un declaracion cu a wordo porta saca for di contexto y a causa un polemica, referente e asunto aki di refugiado. Dado momento e mandatario a bisa cu mirando cu Aruba mes tin su asuntonan cu ta restringie di tuma mas hende, porta ta bon pa e ta un catalisador pa encamina e proceso inicial di tuma e Venezolanonan, pero pasa nan pa otro paisnan cu tin mas lugar pa esaki, manera e.o. Bonaire. E declaracion aki a wordo mal comunica na e mandatario Hulandes encarga cu Reino, esta Raymond Knops, cu a contesta e prome mandatario den un forma cu a sigui cu e polemica. Wever Croes despues a coregi e declaracion y a mustra unda cu e problema di ‘lost in translation’ a bay. Cu e declaracion ultimo di Nacionan Uni, e ta pone Aruba den un situacion (y e otro islanan Bonaire y Corsou) den un situacion ‘interesante’, cu lo tin cu bay wordo atendi cune. Potret cortesia UNHCR