Rapport CFT: Aruba tin debe mas halto di tur pais den Reino Hulandes

ORANJESTAD – “Aruba tin e debe mas halto di tur paisnan den Reino Hulandes aworaki, y esun cu ta aumentando mas cu tur”. Esaki e secretariado di College Financieel Toezicht ta bisa den su rapport final cu a keda entrega dia 12 di september ultimo na gobernador interino di Aruba. NoticiaCla.com a haya un bista di e rapport cu ta indica e punto aki. Segun e rapport, tur e paisnan den Reino a sufri di e crisis di 2008, pero na Aruba esaki a crece mas for di 2009 cu seramento di Valero. “E situacion den tur e paisnan ta asina diverso cu ta dificil si pa tin un comparacion corecto.

Segun e rapport, e gastonan di gobierno a aumenta cu 10% entre 2009 y 2014, mientras cu e entradanan cu apenas 6%. Mes momento ta papia di un aumento di gastonan di personal cu 20%, door di un aumento significativo di cantidad di trahado y contractant den servicio di gobierno (aumento di 6.5%). Banda di esaki, a conoce un aumento di e ingreso salarial average (8,5%) y prima di dunado di trabou di 3.5%.

Problema cu reduccion di BBO a pone cu e entrada na impuesto a cay atras, mientras cu e gastonan a aumenta grandemente desde 2009. Loke ta hala atencion den e rapport, ta cu CFT ta constata cu inversionnan for di presupuesto a keda atras. E debe di gobierno a aumenta tambe den tempo hopi cortico. Esey a pone tambe cu e interes a aumenta tambe hopi lihe, segun CFT ta mustra den e rapport. Como muestra ta mustra cu si na 2009, e pago na interes tabata 120 miyon, esaki a aumenta na 190 na 2014. Y si no tuma medida, esaki lo sigui aumenta te na 230 miyon na 2017. Pues un aumento di 110 miyon den 8 aña di gobernacion. Si compara esaki cu e otro islanan, Aruba su pago di interes ta hopi halto. Un total di 14% di e gastonan total di gobierno, compara cu 3% di Corsou, 2.5% di St Maarten.