Eminente cu Aruba por haya otro aanwijzing pa motibo di presupuesto

ORANJESTAD – Firma so e no ta, pero ta eminente cu Aruba por ricibi un proximo ‘instruccion’ osea un aanwijzing, pa motibo di nos presupuesto y situacion financiero. Den un entrevista awe mainta cu prome minister Evelyn Wever Croes a duna na e emisora Top FM, el a bisa cu e ta kere cu e aanwijzing ta cla caba, traha, pero solamente mester firma esaki. Y contrario na e actuacion di gobierno anterior, e gobierno aki no ta bay bringa e aanwijzing. Motibo pa posibel aanwijzing, ta cu Aruba no ta logra cumpli cu e ley di Laft pa tene e deficit segun un norma aceptabel. Y e efecto di e aanwijzing por ta serio pa Aruba. E ultimo concepto di presupuesto ta bou scrutinacion di Caft, y ta wordo trata tambe pa Raad van Advies. E procedura ta cu CAFT lo mester duna un recomendacion pa un aanwijzing, na conseho di minister di Reino, pa despues nan tuma e desicion final. 

PAKICO

E motibo di e aanwijzing segun Wever, ta pues e hecho cu Aruba no a cumpli cu e norma di deficit manera palabra y conforme ley di Caft esta LAft na 2017 y no ta bay cumpli tampoco na 2018. Mientras cu Aruba a haya tempo ‘extra’ pa traha riba un plan di accion pa drecha e situacion, e prome mandatario a confirma cu no ta bay logra yega na dje toch. Esey ta posibel motibo suficiente pa Hulanda duna Aruba un aanwijzing (instruccion) cu meta pa drecha e situacion financiero y tuma accion di tal forma, cu lo logra e norma bek.

CONSECUENCIA

E consecuencia di un aanwijzing, manera cu Wever a splica awe mainta, ta entre otro nifica cu Hulanda lo tuma e finanzas di Aruba over, lo manda hendenan nos isla pa ta hinca den varios departamento financiero di gobierno. Y esey ta nifica cu Hulanda ta tuma nos situacion financiero over. Nos no por tuma ningun decision financiero mas sin cu Hulanda su hendenan aproba esaki. Wever ta compara esaki cu un situacion pio cu prome cu Status Aparte. E no kier pa e situacion yega asina leu, pero hopi nan no por haci. Mientras cu otro islanan cu a haya aanwijzing, a opta pa bringa esaki grandemente, Wever a laga sa cu Aruba lo no bay bringa esaki. Si e tin cu bin e tin cu bin, Wever a bisa. No ta bay haci e ‘locura’ di bay tene welga di hamber manera ex premier Mike Eman a haci, Wever a sigura den e entrevista. El a reitera cu posiblemente e aanwijzing ta traha caba, pero ta firma so no a firme ainda.

RATING

Si Aruba haya un aanwijzing pa su situacion financiero, esaki lo por directamente afecta nos rating ‘positivo’ cu nos tin aworaki, segun expertonan a informa e portal aki. Agencianan manera FITCH lo ‘downgrade’ Aruba, cu e consecuencia cu nos no ta haya inversionistanan pa inverti, y cu ta bira casi imposibel pa riba tereno internacional (manera p.e. New York) haya placa pa fia. Y manera ta conoci, Aruba tin basta placa pa fia e aña aki atrobe. Ta papia di sumanan di entre 300 pa 500 miyon florin.