• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Analisis: Pago di Royalties. ‘If you want to play, you gotta pay!

Dos siman pasa y pico, e asunto di paga pa cada cancion toca na un lugar comercial, a bolbe riba mesa y instantaneamente a bira un discusion nacional, y pa algun te hasta un batata cayente. E concepto cu un instancia comercial ta paga pa derecho pa toca cancionnan no ta nada nobo. De hecho e ta algo cu ta sosode pa masha ‘siglo’ mes. Ta na Aruba so, nos ta kere cu tur cos ta un ‘freebie’, esta pornada, y instancianan comercial a sa di probecha di esaki te cu el a bira un ‘cultura’. E dicho di ‘den shelo y na Aruba tur cos por’, mesora ta bin den discusion. Hopi liher, e asunto a crea dos campo, esta e musico/artistanan cu awor ta haya ‘pida (chikito) di e bolo’, y e grupo di comerciante cu ‘tin cu comparti nan ganashi diripiente’. Y despues di esey, tur dia cierto artista ta sea tuma parti pa un of e otro banda, y e cos ta birando un ‘novela’. Berdad ta cu no ta prome intento esaki ta pa logra haya e instancianan comercial pa paga ‘royalties’, y lo no ta e ultimo. E diferencia grandi ta, cu e biaha aki tin rednan social cu por plama e informacion aki mas liher, y cu tin un gigante tras di e cantante/artista (SoCan, e compania Canades cu ta registra y administra e cancionnan, asisti pa DuCaPro e compania cu ta acesora nan den Caribe), cu ta duna nan mas ‘forza’ y ‘peso’ pa para firme. E ta manera un sindicato cu ta defende derecho di e ‘trahado’. Esaki ta bay ta e diferencia segun abogado David Kock, cu sin cu e kier, a bira un pion den e asunto aki. Tin cu ta yame caba e ‘abogado miyonario’ pasobra e ‘si lo a gana su bon pida cen cu clientenan manera SoCan y otronan. “Mi no a gana nada” Kock a sigura e portal aki. Mester tume pa su palabranan, pero hecho ta cu Kock diripiente a bira un blanco di critica tambe. Su participacion, segun su propio declaracion, ta pa asisti e companianan menciona legalmente unda ta necesario.

PRO

Esnan cu ta pro, obviamente ta e cantante y cualkier otro cu ta produci y skibi cantica na Aruba. Pa nan, ta manera un alivio y un ‘welcome’ news cu awor ‘porfin’ nan ta wordo reconoci. E hecho cu ta apenas algun cen pa cada ‘toca’ nan lo haya, (di cual mester kita belasting) no ta importante. Ta bay mas pa e hecho cu nan derecho ta wordo salvaguardia. Y durante e prome (y unico presentacion) di e grupo cu a inicia awor cu e discusion, tabata obvio cu tabatin hopi inquietud, pero mayoria tabata bin di e campo di esnan pro. Dudanan manera ken exactamente ta beneficia, y porta mas importante, con ta logra registra y controla cu enberdad e interes di esnan registra, ta wordo salvaguardia. Pero en grande, por a deduci cu ‘tur ta onboard’, skeptico, pero ‘on board’.

CONTRA

Esnan contra, tabata logicamente esnan cu mester habri cartera y cuminsa paga pa algo cu antes tabata pornada. Y manera otro cos, a kere cu custumber ta bira ley. Den e caso aki, tabata mas bien un cos cu ‘tabata na caminda’ aunke esnan envolvi a bira sordo mudo pa e idea so. Critica tras di critica por a tende di por ehempel, algun emisora. Otronan a opta pa ‘duna beneficio di duda, y scucha e ‘prome reunion’ prome cu opina. Curioso ta cu ora cu a tene e prome (y unico) reunion, niun doño di radio tabata presente. Tampoco di otro instancianan comercial. Niun. Por lo menos, nos no a wak nan. Un ex doño di radio si, pero e no ta importante pasobra e no tin cu bay paga nada pasobra e no tin e radio mas. Cada uno cu a papia cune despues, tabatin un motibo pa nan ausencia, for di ‘a keda pega cu trabou’, te na ‘mi no a haya invitacion’. Aunke nan no a aparece na e reunion, nan a rapidamente critica fuertemente tur loke ta esnan cu ta PRO. Gritonan di boycott contra artistanan local, tabata na ordo di dia. “Esey ta bisa hopi di e emisora of instancia comercial” Kock a bisa riba e comentarionan ey. Ta(bata) hopi cla cu e radionan (y posiblemente otro instancianan comercial), no ta dispuesto y no ta bay paga UN debchi pa toca canticanan cu awe ainda ta ‘pornada’.

BOLTER

Sinembargo cos a cuminsa bolter ora cu cierto artistanan local grandi a cuminsa vocifera riba e tema, unda cu algun a cuminsa cita cu esnan CONTRA, esta emisoranan di radio, mientras cu otronan a cuminsa cita cu esnan PRO. ‘Awo tin cos!’, hopi a cuminsa bisa. Pasobra awor cu artistanan local/internacional manera Jeon y Roger Peterson a cuminsa tuma parti opuesto, e cos a manera ‘bira intersante’. Y ora cierto periodistanan tambe tuma postura, e cos ta bira aun mas interesante. Hendenan a cuminsa saca nan scorecard pa wak ken ta ‘ganando e bataya aki’.

E REALIDAD

Shonnan, tur esaki ta interesante pa sigui, pero e realidad ta simpel. Tin regla, y ley y bo tin cu cumpli cu nan. Mescos cu bo ta paga tur luna pa cualkier servicio, sino bo no tin derecho pa use, mescos bo tin cu paga pa por toca un cantica. Pakico si ta paga otro servicionan pa por tin acceso na cantica? Pakico ta paga cierto app pa bo por scucha cierto musica? Pakico ta paga pa derecho pa cine? Bo ta paga pa bay cine toch? Por ta e comparacion no ta mescos, pero bo ta haya e idea. Si bo kier toca algo di un hende, local of internacional, bo tin cu paga pe. Si pa hopi aña bo no a paga pe, bo tabatin ‘suerte’. Pero bo tabata SA cu lo bo mester a bay paga un dia pe. Ata bo ta dispuesto pa paga pa esnan internacional si. Awel pakico no pa esnan local? Anto e suma no ta importa. Ta e hecho. Ta e principio. Y como emisora of otro instancia comercial, e ta nifica cu bo ta cumpliendo cu regla y ley. Punto. Anto pa bisa cu e pago aki ta afecta e instancia (radio) financieramente, ta un escusa fofo. Sigur no si tene na cuenta cuanto tin cu paga den exterior. Cu nos ta local, cu e no ta bay funciona aki, no ta un argumento. No ta bay pa e suma, sino pa e hecho.

CULTURA

E abogado en cuestion durante e prome (y unico ) presentacion, a cuminsa su discurso cu e ehempel di plagio. Esta ora cu hende uza cos di otro hende, sin reconoce y of paga pe. Ta normal cu ora cu un hende uza algo di otro hende, ta sea dune credito, of ta paga pe. Tan simple. E dicho na Hulandes, cu ta solamente solo ta sali pornada, por bin na remarke aki. Ta masha tempo, artistanan local mes tabata y ta uza cancionnan di otro paisnan, converti nan den algo ‘local’ y haya exito tras di exito cu nan. Contal cu bo paga pe, y haya e derecho, bo por use. Tin ta pone DR (Derecho reserva), otronan ta paga pe (mi ta spera anto) pero mayoria ta simplemente uza e informacion, e musica, e tono y ta spera cu ‘eyfo ningun artista original lo haya sa’. Nos ta un isla chikito, unda cu nan lo ‘no haya sa’. Esey ta(bata) por antes. No awor mas. Facebook mes ta un vehiculo cu ta proteha artista contra plagio y of mal uso (illegal). Purba di traha un video den cual bo ta usa musica di un artista registra of internacional, y upload e riba facebook y wak si e ta lagabo. E ta bisabo mesora cu e ta ‘parse’ cu e ta un cancion di cual bo no tin e derechonan, y cu si bo hacie, bo tin consecuencia. Bay purba awe.

IMPLEMENTACION

Loke si mester tuma lugar, ta un bon planificacion y ehecucion di e registracion y control di e produccionan, vooral esnan local. Artistanan local mester tin e siguranza cu nan produccionan enberdad ta salvaguardia. Cu nan ta haya pago miserable pe, no mester descurasha nan. Pero no mester tin e minimo di duda den esnan cu ta ehecuta e operacion. Ainda esey no ta completamente cla. Sea cu ta SoCan Docan of cualkier otro instancia kier cuminsa esaki, e realidad ta cu e la bati na porta di Aruba. mayan un OTRO lo bati na porta y of cuminsa cera esaki debi cu ‘un of otro emisora no a paga’. Tin canalnan di television na Aruba cu tambe ta haci nan mes culpabel diariamente na retransmiti cos cu nan no tabatin derecho ariba. Algun a haya nan mal sirbi, otronan tabatin e suerte cu Aruba ta ‘chikito’ y cu e no ta ‘importante’ ainda pe. Berdad ta cu unabez cu bo paga pa algo, bo ta haya un derecho pa usa e producto, bo ta registra como un compania cu ta actua legal, y mas porta ta habri pabo. Punto. Bo ta haya acceso na un sin fin di posibilidad. Cu e ta un gasto extra. Claro. Pero loke e ta haci, ta core cu esnan cu ta ‘fly by night’, of kier biba cu ‘hala di manteca’, y biba riba custodia di otro. E ta elimina e cantidad ridiculo di 20 pico emisora riba un isla di apenas 100 mil (plus) hende. E ta laga espacio pa esnan cu si kier actua legal y ta serio. Mescos cu a tuma lugar algun aña pasa cu e car rentalnan. You want to play, you gotta pay. Punto. potret ta cortesia di stockphotosfree.com