Operador di deporte acuatico ta perde caso contra gobierno

ORANJESTAD – Un compania di deporte acuatico a perde su caso contra gobierno e siman cu a pasa. Ta trata di e compania Aruba Dream Tours Corporation NV, cu a hiba gobierno corte protestando e decision di gobierno pa re-aloca nan pa un otro sitio, ya cu e sitio ubica no ta corecto. E compania a opta pa envez di atende na e ordo di gobierno (pa medio di taskforce), mustra huez cu financieramente no ta husto pa muda pa un otro localidad. Corte a cita na banda di gobierno, cu consecuencia cu e operador acuatico mester bandona e sitio actual.

E CASO

E operador menciona a hiba gobierno corte, argumentando cu cambiando e di sitio, e lo sufri consecuencianan financiero serio y como tal ta opta pa bringa e decision. Huez sinembargo ta argumenta den su sentencia, cu e operador nunca no a opera na e sitio ‘nobo’ na Eagle Beach na altura di e proyecto di condominio Oceania, y como tal no por sa cu certeza cu si e opera di eynan, e lo sufri consecuencia financiero. Como tal su argumento no ta uno valido, y otro cu esey, e operador no a defende su caso convincentemente pa demonstra cu e lo tin un ‘desbentaha desproporcional’, cu ta dune e posibilidad pa pidi pa ‘schors e decision di gobierno, conforme articulo 54 di LAR. Pues fuera di e asunto financiero, e operador no por a demonstra un otro motibo valido pa no muda pa e sitio nobo.

GOBIERNO

Segun e minister encarga cu infrastructura, Otmar Oduber, e veredicto aki ta importante pasobra “ nos beachnan ta sumamente congestiona na e momentonan aki.” Cumplimento cu e beach policy, segun e mandatario, ta uno na beneficio di e propio operadornan di watersport, hotelnan y otronan cu ta opera riba nos beach nan. “ Ta spera cu e task force ta continua cu su trabou manera cu ta haciendo e, y cu ta reestablece ordo riba nos beachnan”, Oduber a termina bisando. Nota: potret ta archivo di NoticiaCla y no necesariamente di un compania menciona den e articulo.  Lesa e sentencia AKI