Corte di apelacion ta declara sospechoso di asesinato Lalo Webb liber

ORANJESTAD – Corte di apelacion awe a declara e persona sentencia pa e homber Lalo Webb, esta E.J.M. Hereira, liber di tur culpabilidad. Ta trata di e caso cu a tuma lugar dia 19 di maart 2015 na Aruba. Na mei 2017 Corte di prome instancia a sentencia Hereira na 20 aña di prison. Corte di apelacion ta pensa sinembargo, cu no tin suficiente prueba pa por sentencia Hereira.  

Corte a analisa e pruebanan riba cual Hereira a keda sentencia na prome instancia, riba un otro merito. E pruebanan ta basa riba prueba di DNA y tres combersacion cu a tap. Tabatin rastro mixto di DNA riba e curpa, y segun e investigacion, tabatin rastro di DNA di e sospechoso tambe. E tres combersacionnan telefonico, haci riba dia di e asesinato, segun investigacion di polis, tabata di e sospechoso. Segun OM y polis, e sospechoso lo a papia cu esun cu a duna ordo di asesinato. Corte di apelacion sinembargo ta mustra cu e reconocemento di voz y e forma con a acumula esaki, no ta di confia. Corte di apelacion a scucha e combersacionnan aki tambe, mescos cu e abogado a haci. E combersacionnan cu supuestamente a tuma lugar cu esun cu a duna orden pa e crimen, como tal no por wordo admiti y usa como prueba. E resto di e combersacion telefonico y e resultadonan di e DNA hunto como tal, ta duna insuficiente prueba pa conclui cu e tabata di e sospechoso (su so of cu complice), cu a comete e asesinato. Tin posibel otro sospechoso envolvi cu e asesinato y no ta descarta cu otronan a asesina e victima. Esey ta cuadra tambe cu e pruebanan forensico, cu ta mustra cu tabatin DNA di un di tres sospechoso riba e curpa di e victima. Y e hecho cu e telefon cu cual e combersacionnan telefonico a tuma lugar, no tabata di e e sospechoso, y a wordo usa pa otro hendenan, ta dificulta e situacion. Ademas tin hopi puntonan cu no tin coclusion, osea riba cual OM por a haci investigacion pero no a haci esaki.

APELACION

E sospechoso tabata den apelacion pa cu su sentencia. OM tin 14 dia pa bringa e caso den casacion den Hoge Raad na Hulanda.