Oduber: Pashent por controla servicio di docter via un app

ORANJESTAD – Gobierno a hinca e control di servicio di docter den man di e pashent. Pa medio di un app, pashentnan di docter por ‘rate’ e.o. e servicio di e docter, incluyendo e tardanza, e servicio y mas. Asina minister di salud Dangui Oduber a informa durante un conferencia di prensa. Esaki ta debi cu gobierno aworaki no tin midimento di calidad di e servicio, mientras cu tin keho riba esaki. E intencion ta pa activa e servicio aki di app, dentro di tres luna, usando AZV como e instancia cu ta controla esaki.

INVESTIGACION

Oduber a splica cu debi na kehonan, a bay haci un investigacion preliminar di e ‘peak hours’ na eerste Hulp. A resulta cu esaki tabata entre 8’or y 5’or debi cu hopi biaha e pashent no ta haya e docter y ta termina na Eerste Hulp.  

SERVICIO

Pa remedia esaki, Oduber a anuncia cu ta bin cu un app di telefon, cu un pashent por ‘rate’ of ‘midi’ e servicio di e docter, su secretaria, e tempo di asistencia, e tipo di cuido etc. Basa riba esey, AZV lo por actua mas miho pa remedia e situacion. E intencion ta pa e servicio aki ta optenibel dentro di tres luna, y fuera di esey por hacie tambe via un website.

CONTROL AWO

Aworaki, AZV no ta midi e calidad di servicio cu e huisarts ta duna segun Oduber. Loke nan ta midi, ta e comparacion entre docternan di cas, un asina yama ‘spiegelmeting’ . Nan ta compara e docternan di cas, e cantidad di receta haci, y cuanto verwijzing un docter ta duna pa un specialista. Asina nan ta midi e cantidad. Si manda dimas hende pa specialista, of ta skibi mucho receta, AZV ta cai aden.

E APP

Pues loke e pashent awor por midi, ta e servicio di recepcionista, e facilidad, e docter, e tempo di espera pa haya cita etc. E ta dunabo posibilidad tambe riba e acesibilidad di docter di cas. Con facil ta yega na e docter. Cuanto biaha e tin cu yama, cuanto tempo e ta haya. E tipo di rating ta cu un strea te cu 5. Oduber: “Data ta e placa nobo. Sin data no por uza e maneho nobo” Oduber a bisa, refiriendo nan e hecho cu asina por tin data pa traha ariba. Segun Oduber, lo cuminsa cu e eerste lijn, cu ta e docter. Ta bay hacie tambe pa e servicio di botica. “E ta un pilot proyect y nos kier hacie tambe na specialista. Con ta ‘straf’ e docter si su performance ta malo? AZV ta evalua e contract despues di e persona en cuestion, segun Oduber.