Minister di defensa Hulandes a haci bishita hopi ‘low profile’ na Aruba

ORANJESTAD - Minister Presidente Evelyn Wever Croes y minister di defensa Hulandes Ank Bijleveld a topa diabierna na Aruba pa atende entre otro temanan di siguridad entre otro con Hulanda por yuda Aruba eleva nos siguridad. Pa esaki tabata presente tambe minister di husticia Andin Bikker, y comandante di MariniersKazerne Timon van Dishoek y su staff. E mandatario a topa tambe cu Gobernador Alfonso Boekhoudt y a toca temanan di interes nacional, unda cu tambe a toca e situacion di Venezuela. E bishita tabata uno hopi ‘low profile’ den sentido cu no a duna oportunidad pa prensa atende cune, y tur reunion a tuma lugar den forma hopi keto. Na Corsou el a logra haci algun declaracion pa prensa, aunke ey tampoco tabatin un conferencia di prensa pa su bishita. Bijleveld no ta un desconoci pa Aruba ya cu den pasado e tabata secretario di estado pa asuntonan di Reino.