Minister di husticia a mantene regla ‘temporal’ pa Venezolanonan turista y esnan illegal

ORANJESTAD – Aunke cu e situacion entre islanan ABC y Venezuela a ‘normalisa’ esta cu a bolbe aplica ‘excepcion’ pa e blokeo di frontera, minister di husticia Andin Bikker a opta pa mantene un maneho defini por lo pronto. Esaki tabata necesario ora cu a cera e frontera completo, lagando nada di espacio pa por transporta personanan deteni y cu mester a keda deporta. Tambe e ta conta pa esnan cu a surpasa nan estadia di turista pero no por a bolbe debi na e medida. For di e ministerio, NoticiaCla a compronde cu ta mantene e asunto aki manera cu e ta, pa ‘cualkier cos’. A compronde si cu a deporta un grupo di persona caba awe, unabez cu e situacion a ‘normalisa’.

E REGLA

IASA y Warda Nos Costa a informa di e efecto nan secundario como consecuencia di e cierre aereo entre Aruba y Venezuela. Medida nan cu lo wordo tuma pa cu e situacion aki relaciona cu venezolano nan cu vakantie aki na Aruba, of cu ta wordo captura como ilegal.

Manera ya hopi hende sa, e president di Venezuela a dicidi di sera e espacio aereo entre Aruba y Venezuela cu efecto di inmediato diahuebs, loke a significa cu no tabata posibel e trafico aereo directo entre Aruba y Venezuela.

E efecto nan secundario di esaki tabata:

1. E venezolano nan cu ta permanece riba nos isla como turista, y cu nan estadia maximo ta wordo alcansa den e periodo di cierre di e espacio aereo, lo permanece ilegalmente riba nos isla.

2. E venezolano nan captura ilegalmente pa Warda nos Costa den e periodo di cierre di e espacio aereo no por wordo saka di nos isla.

Debi cu nos no por a duna e impresion cu pa motibo di e ciere di e espacio aereo, e turista nan venezolano por permanece pa un periodo indefini y of por continua sin trabou ilegal, e siguiente punto nan a wordo dicidi inmediatamente:

Ad. 1: turista venezolano

Ta haci un distincion entre:

a) E turista venezolano cu tin un garante pa su estadia. Na e momento cu un turista alcansa su maximo dia nan permiti durante e periodo di cierre di e espacio aereo, lo comunica telefonicamente cu e garante. E garante lo wordo informa cu e turista en cuestion, ta wordo impone un obligacion di notificacion semanal. Na e momento cu e espacio ta wordo re-habri e garante mester asegura di cu e turista en cuestion ta sali di Aruba lo antes posibel.

b. E turista venezolano cu a ingresa na Aruba cu su propio solidez financiero, sin garante.

E turista venezolano cu a haya un estadia maximo di 30 dia y cu e dia a yega den e periodo di cierre di e espacio aereo, lo mester pasa na X-edificio di Codemsa pa un extencion turistico.

Ad. 2: ilegal nan venezolano

E venezolano cu ta wordo captura pa Warda Nos Costa durante e periodo di cierre di e espacio aereo den trabou nan ilegal, lo ricibi un ordo di salida di Aruba, pero e remocion fisico aki lo por sosode solamente ora cu e espacio aereo a habri bek. Debi cu e no ta claro ainda cuanto tempo e cierre lo dura, y, pa reduci gasto nan asocia cu un detencion di venezolano nan ilegal, a dicidi di impone na e venezolano captura ilegal durante e dianan final, aparte di un ordo di expulcion, un deber diario di informa. E venezolano involucra mester tin un garante cu lo asumi e responsabilidad cu e venezolano aki ta cumpli cu su deber di informa y cu e ta asegura su mes cu e venezolano ta wordo entrega pa su remocion tan pronto cu e espacio aereo ta habri di nobo.

Den resumen:

E turista venezolano cu durante e periodo di cierre di e espacio aereo:

1. a alcansa e estadia maximo permiti di 30 dia, mester solicita pa un extencion turistico.

2. a alcansa e estadia maximo formal di 90 dia, ta wordo impone un deber semanal di informa atraves di su garante te e momento cu e espacio aereo y e turista en cuestion lo mester abandona nos isla.

3. cu a wordo captura ilegalmente, ta sujeto na e deber di informa den cual e mester tin un garante cu ta responsabel, entre otro cos nan, cu e venezolano ta cumpli cu e deber di informa y cu e lo entrega e venezolano pa su remocion tan pronto e espacio aereo ta habri di nobo.