Gobernador Boekhoudt a inspecciona costa norte yena cu ‘Sargassum’

WARIRURI – Gobernador di Aruba Alfonso Boekhoudt personalmente a bay tira bista na costa norte di Aruba diabierna, pa atende cu e situacion di e yerba conoci como “Sargassum” cu a spula y subi tera. Hunto cu personal di Kustwacht, a mira e situacion pa asina wak con por duna mas asistencia pa e problema. Areanan cu e gobernador a bishita ta entre otro Wariruri, y Santana di Cacho. Na cierto area a haya e sargassum (yerba di laman) hopi halto cu ceronan di entre 3 pa 4 pia halto. Lamentablemente e yerba ta hole y ta choka cierto aspecto di bida marino. Entre esnan cu ta bira victima, ta e tortuganan baby cu ta den e pleno periodo di eclosion. Ta conoci cu Gobernador ta un amante di naturalesa y ta preocupa cu e situacion actual. 

DOW

Ta varios dia caba tin e problema aki na e sitionan menciona. NoticiaCla a compronde cu DOW tabata ocupa cu limpiamento caba di e area, pero ‘mas sargasum’ a subi tera atrobe. Pues e situacion no ta mehorando. Na Bonaire e situacion tabata basta serio na cierto area di e isla, pero eynan mientrastanto cos a mehora hopi y por a deshaci di dje.