Wever-Croes: Excepcion atrobe riba medida tuma pa Venezuela

ORANJESTAD/CARACAS – Tin excepcion riba e medida tuma diahuebs di Venezuela riba ciere di frontera cu islanan ABC. Asina prome minister Evelyn Wever Croes a reacciona riba e caso di diahuebs. Manera NoticiaCla a raporta caba, ayera president di Venezuela, Nicolas Maduro a anuncia cu tur vuelo comercial, pasahero, carga y coreo ta wordo prohibi pa Aruba, Boneiro y Corsow te un proximo aviso.

EXCEPCION

E anuncio di diahuebs 8 di maart di Gobierno di Venezuela ta un ratificacion di e medida ya tuma segun Wever Croes, y un recordatorio cu e medida ainda ta na vigor. “ Sinembargo, atrobe tin excepcionnan riba e medida tuma. Y Venezuela lo evalua casonan special di e acuerdonan cera” e prome minister a sigura.

CIERRE FRONTERA

Despues cu Gobierno di Venezuela a anuncia na januari cu tur trafico aero y via lama lo keda cera entre Venezuela y e 3 islanan pa 72 ora, gobiernonan di Aruba, Corsow, Reino a sinta cu mandatarionan Venezolano dia 12 di januari pa un reunion basta largo pa yega na acuerdonan y pa logra cu e sancion wordo kita y trece solucion riba e problema serio entre Venezuela y e islanan. Sinembargo esaki no a logra pero si a yega na palabracionnan por escrito. Gobierno di Venezuela no a firma e acuerdo aki.

Tambe a yega na acuerdonan cu lo haci excepcionnan. Tur e buelonan cu tawata tumando luga desde e tempo ey tawata excepcionnan di e reglanan venezolano. Pasaheronan cu paspoort Hulandes a wordo permiti pa sali di Venezuela.