Cambionan pa rotonde Super Food a tuma lugar awe mainta

ORANJESTAD – Diahuebs mainta laat personal di DOW, Mota Engil y polis a prepara e caminda di Sasaki yegando y crusando Super Food, pa e cambio anticipa. Tur esaki den cuadro di e rotonde na e cruzada di dicho supermercado. Esaki ta e di dos intento cu lo haci pa regla e situacion di trafico pa e tin menos efecto riba e automobilistanan. E trabounan lo dura 3 pa 4 luna, y e director di DOW Marlon Croes a bisa cu lo evalua si e biaha aki si e cambio lo duna resultado. Recientemente a haci e cambio anterior caba y esey a resulta den un desaster logistico, cu a pone cu minister a cay aden y para e trabou mesora. Filanan di 30 pa 40 minuut y mas a forma y a pone cu a haya un avalancha di keho tanto local como internacional (turistanan rabia ta papia riba internet).

E CAMBIONAN

Departamento di Obra Publico ta informa pueblo di Aruba en general y specialmente nos automobilistanan cu ta haci uso di e caminda principal di L.G. Smith Blvd cu entrante diahuebs 8 maart 2018 for di 9’or di mainta lo bay cera L.G. Smith Blvd banda West (Tropicana Hotel) y laga L.G. Smith Blvd banda Oost (Super Food) habri pa trafico pa ambos direccion. Kiermen cu riba caminda Oost ambos trafico lo bay core. (tweerichting verkeer) Lo bay tin desviacion via Oranjestad, Noord, J.E. Irausuin Blvd y San Miguel.

E desviacionan di caminda ta lo siguiente:

     Trafico for di Oranjestad direccion Noord, ta wordo desvia via di e rotonde di Sasaki (Eagle Bowling) direccion Pos Abou, bira na man robes pa asina drenta Caya Ritmo of Caya Musica y sali riba e crusada entre Bubali y San Miguel direccion Noord.

    Trafico for di Oranjestad direccion Noord ta wordo desvia via di e rotonde Sasaki (Eagle Bowling) direccion J.E. Irausuin Blvd pa asina yega Noord.

     Trafico for di Noord direccion Oranjestad, por subi L.G Smith na e crusada di Mc Donald y ta wordo desvia na haltura di ex House of Cheng pa asina drenta riba e caminda Oost y sigui direccion Oranjestad.