Pagamento di royalties pa artistanan ta sigui crea discusion

ORANJESTAD – Mayoria emisoranan na Aruba no ta positivo pa cu e idea pa paga pa toca cancion di artistanan local y internacional. Di otro banda, artistanan local si ta positivo pa cu e idea pasobra ‘porfin nan ta wordo reconoci’. Diamars den un aula completamente yen, manera cu NoticiaCla a raporta caba, e grupo SoCan y DuCapro y asesora pa bufete di abogado David Kock a splica nan intencion e siman aki. Pero pa straño cu por zona, casi ningun doño di emisora a presenta. Y ta nan ta e grupo cu mas critica tin riba e caso aki. Di otro banda, publicamente si, algun doño ta vociferando nan inquietud y protesta contra e idea aki.

CRITICA

Entre e criticanan lansa, por tende cu ta cuestiona e hecho cu kier pa e emisoranan paga pa toca e cantica di artistanan local, siendo cu e artista ta haya cobertura ‘gratis’ ora cu e bin lansa su cancion na e emisora. Durante e momento ey, ta calcula entre 10 pa 15 minuut sigur di ‘airtime’ cu ta duna e artista e momento ey. Pero si mester paga pa toca e artista su cantica, e ora nan ta pensa, cu mester cobra e artista ora cu e bin e emisora pa e entrevista y lansamento di e cantica.

BONAIRE Y CORSOU

Mientrastanto e portal aki a compronde cu tanto awe cu mayan e grupo Socan y Ducapro hunto cu abogado David Kock ta na Bonaire y Corsou unda cu nan ta haciendo e mesun presentacion cu a haci na Aruba. A sinta diaranson caba na Corsou cu entre otro representantenan di AMAK (Asosacion di musico di Korsou), y a sigui pa Bonaire awe. Segun Kock, e reaccion tabata positivo na Corsou. Pa loke ta Aruba, Kock a bisa brevemente cu e gritonan en contra, ta mas bien gritonan emocional, pero cu unabez cu cos cuminsa cana, cu nan lo wak e parti positivo y tambe forma parti di e ‘deal’. Ademas, e abogado ta pensa cu si bay den e direccion di boycotea artistanan local, siendo cu e emisora tin patrosinadornan local y ta un emisora local, kico esaki ta bisa di e emisora cu ta ‘boycotea’ asina artistanan local.