Oduber: Fast Ferry a haya sitio defini pa por opera

ORANJESTAD – Contrario na pasado, awor si e proyecto di Fast Ferry ta haya un sitio defini pa por opera. Asina minister di infrastructura Otmar Oduber a informa diaranson, despues di a firma un Memorandum of Understanding cu director di Refineria di Aruba pa cierto terenonan di e compania pasa pa gobierno bek.

E MOU

E MoU ta significa cu terenonan cu ta mira cu por wordo desaroya cu na e momentonan aki ta cay bou di RDA pero cu no ta den uzo di Citgo, ta wordo poni disponibel pa Pais Aruba. “ Pa di e forma aki por crea posibilidad pa e Fast Ferry y Waf na San Nicolas entre otro” Oduber a bisa. E Fast Ferry ta un acuerdo cu na nivel di Parlamento a wordo discuti den pasado dentro di Reino cu Hulanda y otro islanan.

TRANSPORTACION

Cu e intencion pa crea un sistema di transportacion di mas o menos 300 hende y mas o menos 200 auto, cual ta significa cu tin un espacio tambe pa carga wordo transporta entre e islanan. Esaki lo significa cu lo haci e transportacion na un forma mas rapido y eficiente entre islanan, ta crea actividad nobo na San Nicolas door cu lo tin mas fluho di hende na San Nicolas cual ta stimula mas desaroyo, den direccion di desaroya San Nicolas den e ciudad di herencia y cultura di Aruba.

UNDA TA OPERA?

‘Un di e problemanan di mas grandi den pasado tabata unda ta laga e Fast Ferry opera for di dje y e Gobierno aki a dicidi cu esaki mester tuma luga for di San Nicolas y pues tin un sitio cual den pasado no tabata e caso. Pues mi a ricibi e ‘opdracht’ for di Ministerraad pa bay negosha cu RDA. Mester bisa RDA tabata hopi habri pa e plannan cu Gobierno tin.’ Pa concretisa e aspecto aki considerando cu e area ta hopi grandi, lo por aloca por lo menos 3 – 5 diferente actividad economico den e area aki di indolenan completamente diferente cual ta haci cu un no ta depende di otro.

TIME LINE

Pa loke ta e time-line, ta trata na yega na un acuerdo pa e aña aki mes y sino otro aña pa den e proximo dos añanan por desaroya e area aki den un waf caminda cu entre otro lo por cuminsa cu e proceso aki pa tin e Fast Ferry.