Croes: Trabou a reanuda caba riba caminda pa rotonde ex Codemsa

ORANJESTAD – Trabounan a cuminsa enberdad na e rotonde di ex Codemsa, manera cu DOW a priminti recientemente. Director Marlon Croes a admiti na NoticiaCla, cu for di diasabra e contratista a cuminsa coba buraco pa deshaci di awa cu ta cay den e area afecta. Tin area cu tin cu bay traha ainda pa deshaci di e awa cu ta bin di e rooi di San Barbola. “Tin trabounan cu a move caba pa alivia e problema di awa” Croes a bisa.

CAMINDA

Tambe a cuminsa traha riba e service road dilanti Kooyman y Aurora (Funeral) Home te na Texas, pa por ‘tie in’ e caminda y realoca e trafico pa nan por caba cu e caminda existente. Esey ta e proceso pa asina aki 6 luna e keda cla.

EXPERTONAN HULANDES 

Manera ta conoci, expertonan Hulandes porfin a haci un midimento riba e parti topografico di e area di Watty Vos Boulevard cu ta problematico (drenahe). Nan trabou ta pa purba yega na un solucion pa e problema di drenahe, esta cu ora cu awa yobe e area ta keda completamente inunda cu awa. Ora cu e contratista a nota esaki, a manda busca e expertonan for di Hulanda pa asisti cu e problema. Diahuebs e contratista ta reuni cu DOW di nan ‘plan di atake’ y duna un ‘update’ di e situacion. E ta un problema di e awa cu no ta core manera mester ta.

DUIKER

Inicialmente e problema di tardanza tabata uno cu e ‘duiker’, esta un area unda cu tin cu laga e awa bay, y e coriente di 60Kw di Elmar na altura di e duiker. Pero despues a resulta cu e otro parti mas cerca di e rotonde nobo na altura di ex Codemsa, tabatin problema cu pasamento di awa. “Nan tin cu caba soluciona esaki ingenieria esaki di nobo, pa nan sa kico tin cu sosode” Croes a bisa.