Minister asombra cu caso di baki di hangua haya riba caya

ORANJESTAD – Asombra, ta loke e minister di Salud di Aruba, Dangui Oduber a keda riba e caso di hanguanan deshaci di un forma incorecto. “Como minister di salubridad mi a keda hopi asombra cu e noticia aki” Oduber a bisa NoticiaCla awe mainta. Ta trata di e caso di e baki cu hangua cu a keda localisa riba tereno banda di waf diamars, completo cu nomber y fecha di nacemento di hende. Claramente no e forma responsabel pa haci di e hanguanan aki. Director di dept di Salud no tabata na altura di e caso, te ora cu e portal aki a acerke cu e informacion. Awe tin un investigacion andando riba e caso aki.

INACEPTABEL

“ Ta inaceptable loke a sosode aki y nos a stel in un onderzoek di inmediato pa saca afor kico a sosode cu e bakinan di hangua uza cu a end up riba caya” Oduber a sigui bisa. Segun e mandatario, na e momentonan aki Departamento di Salud Publico y Inspectie ta atendiendo cu esaki. E la mustra cu material considera como Hazardous mester tin un protocol di biosafe pa colecta, transporta y tratele adecuadamente, pa no crea peliger pa salud y medio ambiente. “ En todo caso nos a tuma esaki hopi na serio y no mag di bolbe ripiti!”Oduber a sigura e portal aki.

E CASO

Manera cu e portal aki a raporta ayera caba, e descubrimento di un baki di hangua uza, completo cu nomber y fecha di nacemento riba nan, a causa un ola di reaccion den comunidad na Aruba diamars. Un ciudadano conoci, a raporta riba su pagina di Facebook cu el a haya esaki den cercania di e porta grandi pafo caminda bo ta drenta pa Coney Island su entrada. E ciudadano ta doño di un compania cu ta maneha bakinan chikito di sushi, ubica strategicamente rond di nos isla. Pero den e caso aki, e mes a keda sorprendi." Pa mi mes cu tin hopi experiencia cu diferente sushi benta riba caya of beach ta di mas!!", tabata su reaccion.

REACCION DIRECTOR DI SALUD

E portal aki a haya reaccion tambe di e director di departamento di Salud riba e tema aki. “Esaki ta hopi espantoso y malo” , e director Jerry Staring a bisa den un comentario breve pa e portal aki. El a indica cu e mes no tabata na altura di esaki. Hopi mas informacion no tabatin riba e caso aki. Pero Staring a sigura e portal aki cu mientrastanto el a duna orden pa su hendenan tuma contacto cu e ‘dienst warenkeuring y higiene y dienst besmettelijke ziekten, y ademas a informa inspectie volksgezondheid riba e caso aki. Foto di baki di hangua, cortesia Clayton Brown.