Hopi interes pa anochi di informacion pa introduci royalties pa artistanan

ORANJESTAD – Interes pa e anochi di informacion riba introduccion di cobranza di ‘royalties’ pa artista/cantante/compositor’ proximamente, tabata grandi. Den un sala yen den aula di Universidad di Aruba, representantenan di bufete di abogado DavidKock Legal, SoCAn, Ducapro y Asociacion di Musiconan y Artistanan Arubano AMAA a presenta e idea na esnan presente. Notable tabata cu no tabatin masha poco (pa no bisa niun) doño di emisora of television, pero mas tanto artista, compositor y locutor di emisora, y prensa. Esaki siendo cu e grupo hopi importante tabata netamente e emisora y televisionan cu tin cu bay paga pa e royaltiesnan aki. E anochi no a cana mucho ‘vlot’ debi na aspectonan tecnico, (falta di mike, cambio di aula ultimo ora debi na esey) y e forma di conduci e anochi.

E ANOCHI

Abogado David Kock (su bufete ta representa e instancia Canades cu kier cuminsa cu e proceso aki di registra y maneha artistanan local y internacional) a cuminsa na splica kico e meta ta, y a uza casonan di pasado unda cu hende ta viola derecho di autor den forma di plagio, y a bisa e ora ‘boso ta compronde den ki direccion mi ta bayendo cu esaki’, indicando cu e kier sigura cu tur hende haya nan ‘fair share’ den e industria aki. Rapidamente e publico a cuminsa debati cu Kock, indicando varios ‘scenario’ y ‘situacionnan hipotetico’ y kier tabata sa con e areglo aki lo a funciona den e situacion ey. Por ehempel, con por garantiza proteccion di un cancion, y ken ta garantiza cu e doño di e cancion ta berdaderamente e doño, si un cantica wordo uza den forma instrumental, si tambe mester paga pe, si toca e cancion den un restaurant, of otro caminda, con ta bay sigura cu e instancia por tin control riba tur esaki. Hopi pregunta y inquietud di mayoria parti, artistanan y of locutornan, cu a sinti cu esaki por tin un impacto grandi of serio riba nan operacion musical. E abogado a purba contesta tur pregunta y indica kico ta e situacion y scenario den cada situacion presenta.

SOCAN

Despues a toca e representante tecnico di Socan, Janice Scott cu a splica e aspecto tecnico di control y maneho di e repertorio di artistanan. Cu ayudo di un presentacion visual, a purba convence esnan presente, di entre otro nan experticio, nan capacidad, pero mas importante, con e lo impacta e artistanan unabez cu e proceso aki cuminsa. A purba mustra cu e compania ta uno grandi, tin un capacidad mundial enorme, usando cifra di miyones na repertorio musical y centenares di miles di artista registra. Pues cu nan ta un organisacion serio y tin e capacidad tecnologico internacional pa por maneha tur cancion cu keda registra. Cu esaki a purba convence esnan presente, cu si nan registra, nan lo ta den bon man y cu tin garantia cu nan interes lo keda bon maneha. E parti cu a haya hopi atencion, ta ora cu Scott a purba enfoca riba e aspecto financiero, dunando bista riba e plachi financiero cu e por nifica pa e artista/compositor. A sigura cu e compania ta uno ‘non profit’, y cu no ta busca ganashi, pero ta opera meramente pa controla y administra e fondonan pa e respectivo artistanan cu registra y participa. A keda cu lo informa e artista/cantante etc ora cu ta cla pa cuminsa registra nan, y lo informa di e desaroyo di negociacion cu e radioemisora nan.