Conferencia na Aruba di paisnan den Reino, riba violencia domestico

ORANJESTAD – Paisnan den Reino Hulandes ta bin hunto na Aruba diaranson y diahuebs pa papia riba e tema di con pa atende cu violencia domestico. Durante e dos dianan aki delegacionnan di Aruba, Bonaire, Curac?ao, Hulanda, Saba, Sint Eustasius y Sint Maarten ta bin hunto pa e conferencia ‘No Mas, No More’. E tema pues tin cu atende cu e problema den Reino Hulandes. Ta prome biaha cu tur pais den Reino Hulandes ta bin hunto pa trata e tema. E conferencia lo inicia diaranson mainta 9 or na Holiday Inn Hotel, y ta wordo habri pa prome minister di Aruba Evelyn Wever Croes. 

VIOLENCIA DOMESTICO

Violencia domestico ta un di e problemanan di violencia mas grandi den nos comunidad. Pa loke ta e combatimento di esaki, tin hopi diferencia entre e comunidad di e respectivo islanan di Reino Hulandes. Durante e conferencia di dos dia, tur representante cu ta atende cu e problema aki den nan trabou diario lo ta representa. Nan lo atende cu tur e plannan di accion nacional y intercambia di idea y experiencia. Tambe tin atencion pa cooperacion cu husticia. Ta mira unda por traha conhunto.

“Tur isla por siña di con otro islanan ta traha e problema. Pero lo ta hopi bon si tur partidonan tuma pasonan concreto den direccion pa un cooperacion mutuo. Esey lo ta historico” Izalina Tavares, cu ta coordinador principal pa ministerio di Salud, Bienestar y Deporte di Hulanda y lo ta miembro di e delegacion di Hulanda.