Corte: Gobierno y The Mill mester para actividad riba tereno roza

ORANJESTAD – Gobierno di Aruba a haya ordo pa actua mas lihe posibel pa blokea den forma fisico e tereno roza na De Mill Resort pa imposibilita mas trabou di construccion riba e tereno. Ademas ta prohibi The Mill Resort pa efectua construccion riba e tereno en cuestion. Y finalmente ta prohibi gobierno pa otorga e tereno en cuestion den erfpacht, te ora cu un caso sumario tuma lugar entre partidonan menciona y Aruba Birdlife Conservation (ABC). Asina huez a stipula den un ‘medida di ordo’ diamars. E caso sumario entama mientrastanto, ta tuma lugar dia 23 di maart proximo.

E SITUACION

A surgi un situacion e siman recien ora cu diripiente trabounan di rosamento di tereno a cuminsa na altura di The Mill Resort, y cu esaki a crea un ola di reaccion, primordialmente pa e organisacion pa proteccion di pahra, ABC. Minister di medio ambiente Otmar Oduber tabata presente na e sitio pa pone su mes na altura di e situacion. Mesora ABC tambe a entama un caso sumario y hunto cune pidi huez pa un medida di ordo mientras cu ta warda pa e caso sumario tuma lugar. E caso mester ta manera casonan di pasado cu ABC a lanta contra varios instancia y compania cu a traha algo, of cuminsa algo riba un tereno cu posiblemente of sigur tabata destina pa naturalesa. Lesa e sentencia di e medida di orden AKI.