Detencion di dos detenidonan den caso Fist prolonga

ORANJESTAD – E ruman muher di e victima di asesinato na de Vuyst (caso Fist), esta S.D.S (18) su detencion a keda prolonga e siman aki cu 8 dia. Asina ministerio publico su vocero Ann Angela a confirma pa NoticiaCla. Diabierna el a keda deteni ‘relaciona cu e caso’, manera cu e portal aki a informa den forma di primicia. Despues el a pasa su prome dos dianan cera (in verzekering stelling), y despues dialuna Huez comisario a prolonga esaki cu 8 dia mas (verlenging Inverzekeringstelling) segun articulo 87 lid 2. Ainda no ta conoci sinembargo kico exactamente e ruman ta wordo sospecha di dje y mas no por wordo bisa, sino cu solamente e ta den un cel na un warda di polis.

E PROME DETENCION

Pa loke ta e prome detencion, cu a tuma lugar 14 di februari di e persona J.A.C. (46), su detencion tambe a keda prolonga y mientrastanto e ta deteni den huis van bewaring na KIA. Sospecho ta cu e persona aki ta e persona cu lo a comete e acto horendo cu e victima Sarahi Sierra. Ademas cu e detencion aki ta considera cu e caso ta ‘practicamente’ resolvi segun PG Alexander van Dam su comentario momento cu a detene e prome persona aki.

E CASO

E caso horendo a haya e nomber di caso FIST, y ta trata di e dama hoben di 19 aña cu a keda asesina diabierna den su cas na De Vuyst na San Nicolas. E melding a drenta 1:45pm, ora cu e ruman muhe chikito a bin hay'e den un camber, ya sin bida. E forma cu a haya e dama tabata basta cruel, segun vocero policial.