OM: Ainda no tin claridad riba causa di morto di baby di crèche

ORANJESTAD – Ainda no tin claridad exacto riba e causa di morto di e baby di algun siman atras. Por corda cu un melding a drenta di un baby cu a bira malo na un crèche, y cu despues a fayece na hospital. E curpa a keda entrega despues na e famia, pero e causa di morto exacto, segun ministerio publico ainda no ta conoci. A confirma tambe cu no a haci autopsia riba e curpa pero si a investiga e curpa prome cu a entrega esaki na e famia. “Enfoque di e investigacion ta sigui riba haya sa kico exactamente a hiba na morto di e baby. E causa di morto dus. Ainda ta investigando pa haya esey duidelijk. Cu otro palabra, investigacion no ta cla ainda” Ann Angela, vocero di ministerio publico a bisa.

E CASO

Vocero suplente di polis Liliana Rasmijn a confirma cu polis a haya melding dia 19 di februari ultimo pa 2:15 pm di un caso di baby cu no ta duna señal di bida na un crèche na Catiri 12-H. Mesora polisnan a acudi y a pidi asistencia di ambulance cu a transporta e criatura mesora pa hospital. "E baby su situacion ta critico" Rasmijn a declara pa prensa e momento ey. E señora di edad cu ta wak pa e baby (e tin un crèche pa hopi aña), a bira malo y mester a haya asistencia medico tambe. Segun Rasmijn, no tabata conoci kico exactamente por a pasa, pero tabatin presencia di hopi autoridad pa cuminsa cu nan investigacion pa resolve e caso aki.