Gobierno a manda para trabaonan na Seroe Crystal

ORANJESTAD – Gobierno a para e operacion andando na Seroe Crystal awe. Asina minister di infrastructura Otmar Oduber a confirma pa NoticiaCla. Manera ta conoci, recientemente e portal aki a informa cu e fundacion cu a lanta pa proteha interes di habitantenan di e area, a bolbe duna gobierno un ultimatum pa ‘actua corecto y conforme cu ley’, sino haye dilanti mesa berde. “Awe Task Force City Inspector a bishita operacion nan na Seroe Cristal y a para e operacion nan eynan” Oduber a bisa e portal aki. Motibo segun cual Oduber a haci tal, ta pasobra e compania(nan) tabata falta di un hindervergunning. Segun habitantenan, esaki ta mas probable e trabounan na e mina na Babijn cu a wordo para. “E ta un paso den bon direccion” un di e habitantenan, miembro di e fundacion a bisa e portal aki. Nan ta wardando riba contesta di e mas di 300 obhecionan cu nan a manda aden, cu ta trata trabounan riba tereno di naturalesa.

ACCION

Cu e accion di gobierno, nan ta actua riba loke nan a bisa recientemente na e portal aki cu enberdad tin dos compania cu ta eherciendo trabou na Sero Cristal sin cu nan tin permiso pa haci tal.   Oduber den un reaccion corto pa NoticiaCla a confirma e recientemente a bisa cu a manda un carta pa minister di husticia Andin Bikker, ‘mustrando riba e hecho cu niun di dos compania tin un ‘hindervergunning’. Esaki ta cuadra cu e keho cu e fundacion cu a lanta pa proteha interes di esnan den e area, a pone den un carta siman pasa ainda. Nan a duna gobierno 14 dia pa cana e caminda corecto legal pa atende e problemanan, sino por spera medida legal. Pa loke ta su responsabilidad mes, e mandatario responsabel pa infrastructura a sigura e portal aki cu e la haci su trabou. “Nos a haci di nos banda tur locual ta regarda nos ministerio”, e mandatario a sigura e portal aki, pero no a bisa kico tur a wordo haci.

ULTIMATUM

Tabata recientemente cu e portal aki a raporta riba e keho di e Fundacion Conserva Area Cristal. Aki e fundacion a bisa cu si en caso cu gobierno y otro instancianan concerni no efectua controlnan adecua na e Area Cristal, y ehecuta ley estricto manera mester ta, e fundacion un biaha mas lo evalua pa demanda gobierno legalmente. Asina e comunicado di e fundacion ta bisa, cu e titulo ‘Ta bira tempo pa accion’. Segun e fundacion a bisa den e comunicado al respecto, cu por corda ainda ora cu gobierno nobo a sinta, cu e minister encarga cu infrastructura Otmar Oduber a tuma accion y anuncia esaki publicamente.