E clubnan di Kiwanis na Aruba cu donacion na Fundacion Ban Uni Man Pa Cria Nos Muchanan

ORANJESTAD; (AAN)- Durante e fin di siman di Kiwanis “Divisional Council Meeting” Lieutenant Governor di Division 26, Sr Giantonio Muller, a haci entrega oficial di e cheque di AWG 38,000 na Sr John Fun di Fundacion “Ban Uni Man Pa Cria Nos Muchanan”.

Den luna di november y december di aña pasa e clubnan di Kiwanis na Aruba; Kiwanis Club of Aruba, Kiwanis Club of Palm Beach Aruba y Kiwanis Club of Young Professionals Aruba a uni pa ehecuta e proyecto di adorno di Pasco di Division 26. E proyecto di adorno di Pasco tabata un idea y iniciativa di Lieutenant Governor Sr. Giantonio Muller y cu tabata conta cu participacion di e 14 clubnan di Division 26 den 6 pais.

E meta principal di e proyecto di adorno di Pasco tabata, pa recauda fondo pa un instancia cu ta percura pa alimenta e muchanan den necesidad na scol den cada un di e paisnan den e division.

Na Aruba e 3 clubnan di Kiwanis a uni y ehecuta e proyecto simultáneamente pa asina recauda fondo pa Fundacion “Ban Uni Man Pa Cria Nos Muchanan”. E fundacion aki ta percura pa algun aña caba, pa e muchanan di menos recurso, haya un desayuno tur mainta na scol mes y asina aporta na nan prestacion na scol, ya cu desayuno ta keda un alimento di sumo importancia.

E proyecto aki a wordo bon ricibi no solamente den e 6 paisnan di Division 26, pero tambe a haya hopi atencion y interes for di rond di mundo.

Kiwanis ta gradici e comunidad y e comerciantenan di Aruba cu semper a duna apoyo y sosten na tur e proyectonan cu Kiwanis ta realisa durante aña pa e muchanan, cu ta e meta principal di Kiwanis y comunidad di Aruba en general. Danki pa yuda Kiwanis sigui aporta y yuda comunidad y specialmente e muchanan cu ta nos futuro.