CTB a organiza e prome edicion di ‘Curaçao Explosion in Aruba’

ORANJESTAD – Un delegacion di Oficina di Turismo di Corsou (CTB) i partnernan den e industria turistico a bishita Aruba pa presenta nan evento i producto durante ‘Curaçao Explosion in Aruba 2018’ (CEA). Durante CEA e delegacion di Corsou a presenta tur loke e isla tin di ofrece durante aña 2018 pa loke ta trata entretenimento. E evento a conta cu primeramente un rueda di prensa sigui pa un marshe di informacion cu a keda bon bishita. Minister di Desaroyo Economico, Dr. Steven Martina a hasi apertura di e marshe di informacion.

Diferente partner den sector di turismo a join CTB na CEA i a hasi uso di e oportunidad pa presentá nan pakete- i prijsnan atractivo. E partnernan di Corsou tabata: Acoya Curacao Resort, Villas and Spa, Papagayo Curaçao, Hilton Curaçao, Sunscape Curaçao Resort, Spa & Casino, Scuba Lodge Boutique Hotel & Ocean Suites, Pietermaai District Curaçao, Quints Travelers Inn, Renaissance Curaçao Resort & Casino, Fiesta Tours, i Curaçao Industrial and International Trade Development Company N.V. (Curinde). Di Aruba a participa: Aruba Airlines, Maduro Travel, i Discovery Travel.

Tambe a hasi uso di e oportunidad pa duna informacion di e diferente evento i festivalnan musical cu lo bai tuma luga e aña aki na Corsou, entre otro: Curaçao International BlueSeas Festival, Curaçao Ponton Festival, Curaçao International Film Festival Rotterdam, Vierdaagse Curaçao, Curaçao Extreme Drag Fest, Velas Latinoamerica Curaçao i Curaçao North Sea Jazz Festival.

E banda ganado di Festival di Tumba di Corsou 2018 Buleria, a anima tur presente i trece un dushi ambiente durante CEA. Un marshe manera CEA ta ideal pa e konsumidó haña tur informacion cu e mester pa e por planea su biahe pa Corsou. Nos hermana isla Aruba semper ta reacciona positivo pa cu e eventonan na Corsou i pesey mes e marshe aki a cai na agrado di e bishitantenan.