Di dos persona deteni den caso FIST (asesinato de Vuyst)

ORANJESTAD - Relaciona cu e caso FIST ( De Vuyst) un rato pasa e dama di inicialnan S.D.S di 18 aña a wordo deteni. Ta trata di e ruman muher di e victima. Cu e detencion aki, ta bira dos persona cu ta deteni den e caso di morto di e dama Sarahi Sierra cu na November 2017 a wordo haya morto den su cas. Ora cu polis a detene e prome sospechoso J.A.C, polis a sigura e portal aki cu por tin mas detencion.

E PROME DETENCION

E persona cu a keda deteni den e caso Fist (asesinato di e dama Sierra na de Vuyst) diaranson atardi ta un conocido di polis, inicialnan J.A.C. (46), segun informacion cu NoticiaCla a logra obtene. Tin informacion tambe cu e persona aki lo tabata hopi cerca di e victima y famia di e victima.

E CASO

 E caso mes a sosode dia 3 di November aña pasa ora cu a haya e dama Sarahi Esther De Los Angeles Sierra, (19) (Aruba 10 September 1998) morto den su cas. Manera raporta anteriormente, docter Giel a constata morto pa 2'or di atardi e dia ey. Informacion ta mustra cu e ruman muhe chikito ta esun cu a haya e curpa den e cas. Na e sitio ambulance a duna asistencia na e famianan, cu logicamente tabata hopi emocional pa perdida di nan ser keri.