Emisoranan na Aruba cu sentimento mixto pa paga royalties

ORANJESTAD – E anuncio cu artistanan tanto local y internacional lo cobra royalties (placa) pa radio y television toca nan cantica, no a cay den bon tera. Por lo menos varios emisora ya caba a vocifera nan disgusto cu e idea, mientras cu algun otro a opta pa warda e reunion di otro siman cu e compania(nan) pa nan bisa algo. E artistanan local mes, algun skeptico, a brasa e idea y ta hopi contento cu ‘porfin nan ta haya nan fair share’. E idea ta pa na april/mei caba, cuminsa implementa e proceso aki di afilia, registra, toca y cobra pa e toca di cada cantica. Awe tardi mientrastanto tin un reunion di tur radioemisora pa atende e problema aki. 

REACCION POWER FM

E prome radio pa reacciona tabata Power FM pa medio di su propietario Ralph Maduro, tabata un skeptico y desaprobacion. Segun Maduro, e no ta kere cu e lo bay funciona. “Den exterior ta net contrario, ta paga artistanan ta paga radio pa por toca nan cantica. Aki ta net omgekeerd”, Maduro a cuminsa na bisa e siman aki. Segun Maduro, e lo nifica fin pa artistanan local pasobra lo no bay toca nan canticanan e ora. E suma menciona di entre 3000 pa 4500 florin ta hopi y e no ta kere cu e ta bay funciona. E ta considera esey un peso financiero extra pa e emisora(nan) y cu e otronan tampoco lo bay di acuerdo cu esaki

MAGIC FM

E doño di emisora Magic FM, Erin Croes a informa e portal aki cu prome cu e duna su reaccion, e ta prefera bay e reunion otro siman pa tene prome kico ta kico. Despues e ta dispuesto pa duna un reaccion publicamente. Di otro banda e portal aki a compronde cu e ta considera razonable cu mester paga, basta e suma ta corecto di tal manera cu e ta un win-win situation

REACCION LATINA 92.3FM

Otro radio cu a reacciona, tabata e gerente di Latina 92.3FM, Sherwin “Win” Donata. “Mi punto di bista ta cu e radio ta hasi e artista grandi dor di toca su cantica pa despues e artista ta gana su placa cu nan cdnan i conciertonan cu nan ta presenta na nan publico i gana placa. Otro ehempel, un artista internacional ta cobra hopi placa pa duna nan show aki na Aruba. Loke nan ta gana den un anochi, e radio i television nan pareu no ta gana e cent ey den un luna. Dus e grupo cu tin pensa di cobra e medianan televisa i radial ta absurdo paso nos tambe como doño di radio tambe ta pensa di bin cu solucion i na final ta e artista ta wordo perhudica. Na radio Latina 92.3 ya tin su plan traha caba. Mi ta ripiti e artistanan local ta bay sali perhudica paso ta e medionan radial i televisa ta hasi e artista grandi i sin cobra e artista un cent preto” Donata a sigui bisa.

E CASO

Tabata e siman aki cu e portal aki a bin cu e primicia cu artistanan local y internacional cu intermediacion di un compania grandi renombra Canades, lo cuminsa cobra emisora y television y tur otro instancia comercial cu ta usa material di artistanan local y internacional, un suma pa luna. Asina kier salvaguardia e derecho di e artista manera ta sosode rond di mundo.

REUNION DI RADIONAN

Pues, manera ya indica, awe atardi, tur doño di radio lo ta reuniendo cu otro riba e tema, pa discuti e regla nobo aki ya cu mayoria di e radioemisoranan no ta di acuerdo cu e regla aki. NoticiaCLa lo keda pendiente pa resultado di e reunion aki.