Azurra: Hendenan deteni di e contratista tabata ‘supervisa’ y no traha

Azurra: Hendenan deteni di e contratista tabata ‘supervisa’ y no traha

Posted on 03/2/2018 10:56 am AST | Updated on 03/2/2018 11:45 am AST

ORANJESTAD – Kibrando silencio riba e tema, e contratista principal responsabel pa e Mancamp di CITGO Aruba, Azurra a confirma cu ta 35 persona di nan staff a keda deteni dialuna durante un razzia di Guarda nos Costa. E director Antonio Azzarati den un entrevista exclusivo cu NoticiaCla, a bisa cu nan tur tabata legal, den sentido cu nan tabata den margen di nan tempo riba e isla como turista, usando e status ey. A sigura cu como tal, esnan cu e status ey, ‘no tabata traha’, pero supervisa cierto trabou aki aya, y tabata wordo paga na Venezuela, y no na Aruba.

PERMISO TURISTA

Algun di nan tabatin permiso di trabou y e otronan tabata riba e isla ‘como turista’, y tabata extende nan periodo di estadia corespondiente manera mester ta. Pero pa e personal di Guarda Nos Costa, a interpreta e situacion cu a haya nan na sitio di trabou, y no por a mustra permiso di trabou y como tal a detene nan tur. Azzarati a sigura e portal aki cu mesun dia, pa anochi tur tabata bek na Venezuela, ya cu a percura pa saca nan mesun dia for di Aruba.

SITUACION REAL

For di fuentenan den asunto di permiso, e portal aki a compronde cu tabata sospecha cu e compania aki for di aña pasa november tabata posiblemente maluza clausula cu ta regula bishita di turista. Esaki den sentido cu e compania aki lo tabata laga trahado di Venezuela yega Aruba, y laga nan permanese como si fuera nan ta turista, pa nan ta ‘legal’ na Aruba, pero clandestinamente traha riba e tereno. Ta trata di e fenomeno di ‘zakenbezoek’, esta turistanan cu ta bin pa finnan comercial pa atende cierto asuntonan di negoshi, pero no ta ‘echt traha’. Pero e forma con esaki lo tabata bay, lo a crea sospecho cerca e departamentonan concerni, ora cu a compronde cu pa henter e grupo (e doño ta papia di 35 pero e departamento a tende di cifra di 60) tabata bin keda como turista, mientras cu mes momento tin un cantidad di 60 trahado local trahando bou subcontratistanan. Pues segun e informacion ricibi, e departamento tabata haya sospecho claro cu tabata trata di evadi e leynan di admision, trabou y di impuesto.

TASKFORCE

Como tal, a formula e team cu recientemente a actua, y for di e bishita cu a haci dialuna ultimo, a bin haya un situacion unda cu a constata cu nan (e trahadornan) ta traha, y no ta atendiendo reunion of just supervisa manera cu nan ta bisa. “Nan a haya nan ta traha. E mesun trahadornan ey a duna declaracion cu ta trahado nan ta, entre nan metselaar y otro. Pues loke e compania a bisa e departamentonan algun luna pasa y loke nan tabata bisa awor (den programa di NoticiaCla), no tabata cuadra. A atende nan cu un persona cu ta bin como ‘turista’ no por traha. Si nan ta wordo paga aki na Aruba of no, esaki no ta permisibel. E portal aki a compronde cu e proceso aworaki ta cu ta en espera di e finalisacion di e raportnan di e control, lo haci diferente check administrativo, y lo siguientemente duna e compania un chens pa reacciona riba e intencion di aplica un multa administrativo, y despues ta tuma e desicion si lo implementa un multa administrativo na e compania y si ta asina, lo tambe lo stipula cuanto e multa lo ta.

  • Postobon
  • Powered by SETAR