DOW: Caminda di L.G. Smith Blvd ta keda habri temporal te cu dialuna

ORANJESTAD - Departamento di Obra Publico ta informa cu e caminda entre rotonde Sasaki y cruzada Superfood ta completamente habri temporalmente. Dialuna 5 maart 2018 lo bay haci adaptacion ariba e desviacion existente. Alaves e caminda cu si ta sigui cera ta entre RWZI Bubali y Amsterdam Manor.

CHAOS

Tabata diahuebs cu e situacion di trafico na altura di Superfood cu ponemento un rotonde a bay malo. Trafico congestiona cu fila di entre 40 pa 60 minuut di espera, a pone cu gobierno a dicidi pa trece cambio. Diahuebs atardi/anochi minister di infrastructura Otmar Oduber a combersa cu Director di DOW, Sr Croes, kende den oranan mas trempan diahuebs tawata tin contacto cu e contratistanan cu ta bezig cu Watty Vos Blvd. E rotonde na altura di Super Food ta parti di e proyecto PPP aki. A palabra cu e director cu e situacion di trafico di diahuebs durante di dia no ta acceptable y tampoco por continua y DOW ja caba a palabra cu e contratista pa sinta diabierna mainta y trece cambionan radical, diabierna mes, pa por logra agiliza e fluho di trafico den e area aki.